स्याङ्जा ३ पुस । आज डिसेम्वर १८ अन्र्तराष्ट्रिय श्रम आप्रवासन दिवस। दिवसको अवसर पारेर (बुधवार) पुतलीबजार नगरपालिकाले वैदेशिक रोजगारबाट फर्केका ब्यक्तिहरुसंग छलफलगरि दिवस मनाइएको छ ।
सुरक्षित आप्रवासनको आधार, सूचना र सीप सहितको रोजगार भन्ने मूल नाराका साथ वैदेशिक रोजगारबाट फर्किएका ब्यक्तिहरुसंग अन्तरक्रिया तथा छलफल गर्दै दिवस मनाइएको हो ।
अन्र्तक्रियाको शुभारम्भ गर्दै नगरप्रमुख तुलसीराम रेग्मीले रोगजारका लागि विदेशमा गइ काम गर्नेको संख्या दिनानुदिन ह्वात्तै बढेको बताए। बिदेश यात्रा र रोजगारको गन्तब्यलाई सुरक्षित बनाउन नगरपालिकाले आप्रवासी स्रोत केन्द्र स्थापना गरेको जानकारी गराए। विदेशयात्रामा रहेका युवायुवतीले यसबाट लाभ लिन समेत उनले सुझाव दिनुभयो ।
राहदानी बनाउनका लागि प्रशासन कार्यालयमा आउने युवायुवतीलाई लक्षित गर्दै केन्द्रको समेत जिल्ला प्रशासन कार्यालय स्याङ्जाको हाताभित्र स्थापित गरिएको उहाको भनाई छ ।
सोही कार्यक्रममा प्रमुख प्रशासकिय अधिकृत धर्मराज ढुंगानाले सुरक्षित आप्रवासन सम्बन्धी कार्यपत्र प्रस्तुत गर्नुभएको थियो । कार्यपत्र प्रस्तुत गर्दै अधिकृत ढुंगानाका अनुसार, ‘चालु आव २०८१÷०८२ वैदेशिक रोजगारीलाई सुरक्षित र मर्यादित बनाउन बैदेशिक रोजगार सम्बद्ध कानूनमा परिमार्जन, सीप सहितको रोजगारको सुनिश्चितता, निशुल्क अभिमूखीकरण, श्रम सम्झौता, बैदेशिक रोजगारमा जानेको निशुल्क बैंक खाता खोल्न र विप्रेषणमा सहयोग, रिटर्नी उद्यमशिलता कार्यक्रम संचालन गर्ने जस्ता सरकारका नीति तथा कार्यक्रम कार्यान्वयन गर्ने उल्लेख गरेको छ ।’
कार्यक्रममा सुरक्षित आप्रवासन परियोजना (सामी) गण्डकी प्रदेशका प्रमुख रोजलिङ सिंहले परियोजना र पुतलीबजार सामी प्रमुख अनन्त रेग्मीले नगरपालिका भित्रका अवस्थाका बारेमा जानकारी गराउनु भएको थियो भने बैदेशिक रोजगारबाट फर्किएका सहभागीले विदेशमा भोग्नु परेका अवस्थाका सुनाउनुभएको थियो ।
यसैगरी, सामी परियोजनाका अनुसार नगरपालिकामा ९ हजार ९५५ घरधुरी मध्ये ४ हजार १७६ वैदेशिक रोजगारमा गएको, १ हजार ८८४ बैदेशिक रोजगारबाट फर्केको र २ हजार २९२ जना वैदेशिक रोजगारमा रहेको बताइएको छ ।