काठमाण्डौं २ भदौ । माल्दिभ्समा आयोजना हुने १३ औं संस्करणको साफ च्याम्पियनसिप फुटबल प्रतियोगितामा ५ देशले सहभागिता जनाउने भएको छ ।
दक्षिण एसियाली फुटबल महासंघ (साफ) ले आज १३ औं संस्करणमा ५ देशको सहभागिता रहने जनाएको छ । यस संस्करणमा आयोजक माल्दिभ्स, नेपाल, भारत, बंगलादेश र श्रीलंकाको सहभागिता रहेको छ ।यस संस्करणमा भुटान र पाकिस्तानको सहभागिता रहेको छैन । भुटानले कोरोना महामारीको कारण देखाएको छ । पाकिस्तान फुटबल भने फिफाको निलम्बनमा रहेको छ ।
पाँच राष्ट्र सहभागी साफ च्याम्पियनसिप अक्टोबर १ देखि १३सम्म आयोजना हुनेछ । नेपालले आयोजक माल्दिभ्ससँग आफ्नो पहिलो खेल खेल्ने छ । नेपाल र माल्दिभ्स बीचको खेल अक्टोबर १मा मालेस्थित राष्ट्रिय फुटबल स्टेडियममा हुनेछ । साफ च्याम्पियनसिपको लागि नेपालले मुख्य प्रशिक्षक अब्दुल्लाह अलमुताइरीको नेतृत्वमा पोखरामा तयारी गरिरहेको छ ।