स्याङ्जा, १६ भदौ । नेपाली कांग्रेस स्याङ्जाले अधिवेशनको तयारीका लागि मतदान अधिकृतलाई प्रशिक्षण दिएको छ । नेपाली कांग्रेसले आसन्न १४ औं महाधिवेशनका जिल्लाका २ वटा संघीय निर्वाचिन, ४ वटा प्रादेशिक, ११ वटा स्थानीय तह र ९७ वटा वडाका मतदान अधिकृतलाई तालिम उपलब्ध गराइएको हो । स्याङ्जा सदरमुकाम र वालिङ् नगरपालिकामा आयोजित छुट्टाछुट्टै कार्यक्रमगरी वडागत मतदान अधिकृतलाई प्रशिक्षण दिइएको हो ।
सदरमुकाममा आयोजित कार्यक्रममा बोल्दै जिल्ला निर्वाचन अधिकृत अधिवक्ता रामचन्द्र गौतम आरसीले नेपाली कांग्रेसको बिधान र निर्देशिका बमोजिम मतदानको प्रयोग, मताधिकारको उपयोग गर्दै वडा समिति र क्षेत्रीय प्रतिनिधी निर्वाचनका लागि आवश्यक सुझाव सहित प्रशिक्षण दिनुभएको थियो ।
कार्यक्रममा पत्रकार महासंघका निवर्तमान अध्यक्ष ओमप्रकाश शर्मा, सहायक निर्वाचन अधिकृत बाबुकुमार सिग्देल र निर्वाचन समिति सचिवालय सदस्य फणिन्द्रप्रसाद पौडेलले निर्वाचन र यसका पद्धतीका बारेमा आ आफना धारणा सहित सुझाव ब्यक्त गर्नुभएको थियो ।