पोखरा २५ असोज । काठमाडौंबाट आज घान्द्रुक घुम्न आएका ७ जना सहित ९ जना सवार जिप दुर्घटना भएको छ । दुर्घटनामा चालक सहित ८ जनाको मृत्यु भएको छ ।
कास्कीको नयाँपुलबाट घान्द्रुक जाँदै गरेको जिप घान्द्रुक गाउँ पुग्नु अघिको कलाभिरमा दुर्घटना भएको हो । ग १ ज ६९०० नम्बरको जिप सडकबाट झण्डै डेढ सय मिटर तल खसेको प्रहरीले जनाएको छ ।
पोखराबाट पर्यटकीय क्षेत्र अन्नपूर्ण–११ घान्द्रुक जाँदै गरेको गाडीमा सवार चालक सहित ९ जना मध्ये ८ जनाको मृत्यु भएको प्रहरीले जनाएको छ ।
मृत्यु हुनेमा अन्नपूर्ण ५ नयाँपुल बस्ने ४२ वर्षका खुसीमान क्षेत्री, काठमाडौं महानगर ३ गोंगबुका १८ वर्षका जिनलव घिसिङ, २४ वर्षका सुजा चौधरी, २० वर्षका लिजा चौधरी, २० वर्षका सुमन चौधरी, २२ वर्षका अचुतम काफ्ले, १८ वर्षका आशिष आले र गोरखा घर भई हाल काठमाडौं ३ गोंगबु बस्ने २७वर्षका विनय क्षेत्री रहेका छन् ।
एक जना घाइते भएको पनि बताइएको छ । काठमाडौं गोंगबुका २० वर्षका देबिका घिसिङ घाइते भएको उहाँलाई उपचारका लागि अस्पताल लगिएको छ ।