पोखरा ८ साउन । गण्डकीका मुख्यमन्त्री कृष्णचन्द्र नेपाली पोखरेलले एक महिनापछि मन्त्री मण्डललाई पूर्णता दिनुभएको छ । शुक्रबार थप ६ जना मन्त्री नियुक्त गर्दै ११ मन्त्रालय रहेको मन्त्रीपरिषद्लाई पूर्ण बनाउनु भएको हो ।
नेपाली कांग्रेसका ३ जना र नेकपा माओवादी केन्द्रका ३ जना गरी ६ जना थपिएका हुन । थपिएसंगै नयाँ जिम्मेवारी अनुसार कांग्रेसका कुमार खड्काले भौतिक पूर्वाधार, सहरी विकास तथा यातायात मन्त्री, विन्दुकुमार थापा आन्तरिक मामिला तथा कानुन मन्त्री, मेखलाल श्रेष्ठ शिक्षा, संस्कृति, विज्ञान तथा सामाजिक विकास मन्त्री र मणिभद्र शर्मा पर्यटन, उद्योग, वाणिज्य तथा आपूर्ति मन्त्रीमा सपथ लिनु भएको छ ।
यसैगरी, माओवादी केन्द्रबाट रामजी बरालले अर्थ मन्त्रालय, चन्द्रबहादुर बुढाले भूमि व्यवस्था, कृषि, सहकारी तथा गरिबी निवारण मन्त्रालय र दीपक चर्ती मगरले वन, वातावरण तथा भू–संक्षण मन्त्रालयको जिम्मेवारी पाउनु भएको हो ।
माओवादीबाट मधुमाया अधिकारी यसअघि नै मन्त्री बन्नुभएको छ । उहाले स्वास्थ्य तथा जनसंख्या मन्त्रीको जिम्मेवारी पाउनु भएको छ। जसपाबाट हरिशरण आचार्य ऊर्जा, जलस्रोत तथा खानेपानी मन्त्री बन्नु भएको छ भने स्वतन्त्र सांसद राजीव गुरुङ दीपक मनाङे युवा तथा खेलकुद मन्त्री हो ।
नवनियुक्त मन्त्रीहरुलाई गण्डकी प्रदेश प्रमुख सीताकुमारी पौडेलले सपथ गराउनुभयो । नवनिर्वाचित मन्त्रीहरुले आज नै पदभार सम्हाल्नु भएको छ ।
नयाँ मन्त्रीको नियुक्तिसँगै गण्डकी प्रदेश सरकार ११ सदस्यीय भएको छ । नेपाली कांग्रेस संसदीय दलका नेता कृष्णचन्द्र नेपाली पोखरेलले २९ जेठमा मुख्यमन्त्रीको सपथ लिनु भएको थियो । सोही दिन उहाले अरु ४ जनालाई विना विभागीय मन्त्री बनाउनुभयो । कांग्रेसबाट कुमार खड्का, जनता समाजवादीका हरिशरण आचार्य, माओवादीकी मधुमाया अधिकारी गुरुङ र स्वतन्त्र सांसद राजीव दीपक मनाङे २९ जेठमै मन्त्री नियुक्त हुनुभएको हो ।
