स्याङ्जा १ साउन । गल्याङ नगरपालिका वडा २ टकुनचौरमा ३५ वटा घरका लागि खानेपानीका धारा निर्माण गरिएको छ । पानीको अत्यन्तै समस्या रहेको सो गाउँमा खानेपानीको धारा आँगन राखिएपछि स्थानीय उपभोक्ता खुशी देखिएका छन ।
आर्थिक बर्ष २०८१÷०८२ को प्रधानमन्त्री रोजगार कार्यक्रम अन्र्तगत नगरपालिकाको २ लाख रुपैंयाको लागतमा ३५ वटा धारा निर्माण गरेको नगरपालिकाले जनाएको छ ।
सबैलाई खानेपानीको सहज पहुँचमा ल्याउने उदेश्यले ‘एक घर, एक धारा’ अभियान संचालनगरि खानेपानी उपलब्ध गराइएको नगरप्रमुख गुरुप्रसाद भट्टराईले जानकारी दिनुभयो ।
नगरप्रमुख भट्टराईले खानेपानीको धाराको अवलोकन सहित खानेपानीको शुभारम्भ गरेका छन्। पालिकाबासी सबैका घरघरमा खानेपानीको ब्यवस्थापनका लागि काम जारी रहेको उहाले बताउनुभयो ।
उहासंगै रोजगार शाखा प्रमुख खगेन्द्र भण्डारी, प्राविधिक माधब कडेंल, उपभोक्ता समितिका अध्यक्ष गोबिन्द भण्डारी र स्थानीयबासीले घरघरमा खानेपानी उपलब्ध गराएर पुण्यको कार्य गरेको भन्दै खुशी ब्यक्त गर्नुभयो ।
बर्षौंदेखि खानेपानीका समस्या भोग्दै आएका स्थानीयबासीका आफनै घरआँगनमा खानेपानी पाएपछि हर्षित एवं खुशी छन । घरमै पानीको सुबिधा भएपछि पशुपालन र तरकारी खेतीका लागि पनि सहज बन्ने उहाहरुको भनाई छ ।
धारा निर्माण उपभोक्ता समिति र नगरपालिकाबीच यही असारसम्ममा सक्नेगरि मंसिर अर्थात करिब ८ महिनाअघि सम्झौता भएको थियो।