स्याङ्जा ८ भदौं । बिरुवा गाउँपालिकामा भएको आर्थिक अनियमितताका बारेमा नपाली काँग्रेस विरुवा गाँउपालिकाले ध्यानाकर्षण गराएको छ । सुशासन कायम गर्ने प्रतिबद्धता जनाएका जनप्रतिनिधिले नै आर्थिक अनियमिततामा गरेको भन्दै पालिकाका सभापति युवराज केसीले विज्ञप्ती मार्फत ध्यानाकर्षण गराउनुभएको हो ।
कांग्रेस सभापती केसीद्धारा जारी विज्ञप्तीमा जन प्रतिनिधिहरूको संलग्नतामा आर्थिक अनियमितता गरेको, उपभोक्ता समितिसँग मिलोमितो र विभिन्न विकास योजनाहरुमा अपारदर्शीता अपनाएको जस्ता गुनासा आएको जनाइएको छ ।
यसअघि पनि प्रतिपक्षमा रहेको नेपाली कांग्रेसले अनियमितताका बारेमा प्रश्न उठाउदा समेत वेवास्ता गरिएको उल्लेख छ । पालिका भित्र भए गरेका कामहरुमा अपारदर्शिता र अनियमितता भए पछि सत्य तथ्य सार्वजानिक गर्नुपर्नेमा आफ्ना कमिकमजोरीहरुलाई ढाकछोप गरि नेपाली कांग्रेस विरुवाले उठाएका समसामयिक विषयवस्तु लाई गाउँपालिकाले राजनैतिक पूर्वाग्रहको संज्ञा दिई सत्यतथ्य लुकाउने प्रयास गरेको भनिएको छ ।
विरुवा गाउपालिकाले पछिल्लो समयमा गरेका विकाश निर्माणका काममा भएका अनियमितता, कोभिड नियन्त्रणमा भएका आर्थिक अनियमितता, वडाका बाटाहरु ग्रावेल गर्ने नाममा २५ लाख विनियोजित गरि गरिएको अनियमितता, म्याङखोला पुल उद्घाटनमा भएको खर्च सार्वजानिक नगरिएको, भञ्ज्याङ विरुवा सडक खण्ड अन्तर्गत देउराली डाँडाको पहिरो नियन्त्रणमा चासो नदिइएको, युवा स्वरोजगारको नाममा २० लाखको हलो वितरण गर्ने कार्यक्रम विना कार्यविधि वास्तविक किसानलाई नभई पार्टीका कार्यकर्तालाई वितरण गरिएको, सुन्तालाका बेर्ना बाड्ने कार्यक्रम अपारदर्शी ढंगबाट गरिएको विषयमा खोजी गरी तत्काल सार्वजानिक गर्न माग गर्दै २०७८ असार २८ गते गाँउपालिकालाई ज्ञापन पत्र बुझाइएको विज्ञप्तीमा छ ।
विज्ञप्तीमा छ “आफ्नो कर्तव्यबाट पन्छिदै जनताको हक अधिकारलाई कुल्चदै गाउपालिकाले गरेका यस्ता अनियमितताका कामहरु प्रति हाम्रो घोर आपत्ति छ । ” गाउँपालिका भित्र भए गरेका आर्थिक अनियमितता एवम् अपारदर्शी कार्यहरुको सत्य तथ्य जानकारी गराउन जोडदार माग गर्दै सत्य, तथ्य विवरण सार्वजानिक नगरेको खण्डमा जुनसुकै कदम चाल्न नेपाली कांग्रेस विरुवा बाध्य हुने चेतावनी दिइएको छ ।
