काठमाण्डौं १० भदौ । प्रदेश नम्बर १ को मुख्यमन्त्रीमा भीम आचार्य नियुक्त हुनु भएको छ । मुख्यमन्त्री शेरधन राईले पदबाट राजीनामा दिएसँगै प्रदेश प्रमुख सोमनाथ अधिकारी प्यासीले आचार्यलाई मुख्यमन्त्री नियुक्त गर्नुभएको हो । नेकपा एमालेको सचिव समेत रहेका आचार्यलाई मुख्यमन्त्री बनाउने गरी आजै बसेको संसदीय दलको बैठकले दलको नेता चयन गर्ने निर्णय गरेको थियो ।
यसअघि, मुख्यमन्त्री शेरधन राई अल्पमतमा पर्ने स्थिति आएपछि उहाले राजीनामा दिएर आचार्यलाई मुख्यमन्त्री बनाइएको हो । वागमती प्रदेशमा अष्टलक्ष्मी शाक्यलाई गरेजस्तै प्रक्रिया पुर्याएर आचार्यलाई प्रदेश १ को मुख्यमन्त्री बनाइएको हो ।
मुख्यमन्त्री आचार्यले अब एक महिनाभित्र विश्वासको मत लिनुपर्ने हुन्छ । ९२ सदस्यीय प्रदेशसभामा अहिले एमालेको एकल बहुमत छ। सभामुख सहित एमालेका ५१ सांसद छन्। बहुमत पुर्याउन ४७ सांसद आवश्यक पर्छ। एमालेबाट विभाजित बनेको माधवकुमार नेपाल नेतृत्वको नेकपा एकीकृत समाजवादी तिर कति सांसद् जान्छन् भन्ने खुलेको छैन।