पुतलीबजारको नीति कार्यक्रम र बजेट सार्वजनिकरण

स्याङजा, १० असार । पुतलीबजार नगरपालिकाले आगामी आर्थिक बर्षको नीति कार्यक्रम तथा बजेट बिहीवार सार्वजनिक गरेकोे छ ।
पुतलीबजार नगरपालिकाले स्वरोजगारका लागि प्रेरितगरी उद्योग, ब्यापार ब्यवासाय तथा कृषि र स्वास्थ्यलाई प्राथमिकतामा राखेको छ । समृद्ध पुतलीबजार, सुखी नगरबासीको मूल लक्ष्यलाई पुरा गर्न पूर्वाधार विकास, कृषि, उद्योग, ब्यापार, पर्यटन, सुशासन, स्वास्थ्य, शिक्षा, सामाजिक क्षेत्र लगायतलाई नगरपालिकाकोे नीति तथा कार्यक्रममा समावेश गरेको हो ।
नगरपालिकाद्धारा सदरमुकाममा आयोजित नवौ नगरसभा मार्फत नीति तथा कार्यक्रम सार्वजनिक गर्दै नगर प्रमुख सीमा क्षत्रीले सुन्तलाको शहर, एक टोल एक नर्सरी, एकघर एक करेशावारी, आधीखोला, अरौदीखोला र बाडखोलाको संगमस्थलमा त्रिवेणीधाम, होमस्टे, उद्योग ब्यवासाय, सहकारी, स्वास्थ्य, शिक्षा, उद्यमशिलता, रोजगारी र उत्पादन वृद्धि, हुन्छ नगरपालिकाको समृद्धि, कर डर होईन, नगर विकासको भर हो, पुतलीबजार नगर उज्यालो शहर र स्वच्छ पुतलीबजार कार्यक्रमलाई प्राथमीकतामा राखेको बताईन।
यसैगरी, नगरसभामा ८७ करोड २२ लाख ७० हजारको बजेट प्रस्तुत भएको छ । उपप्रमुख महेश पुरीले नगर सभामा आर्थिक वर्ष २०७८÷७९ का लागि ८७ करोड २२ लाख बजेट प्रस्तुत भएको हो । चालु खर्च तर्फ ५१ करोड ४३ लाख १२ हजार र पुँजीगत खर्च तर्फ ३७ करोड ७९ लाख ५८ हजार रहेको उहाले जानकारी दिए ।
बजेटमा नगरपालिकाले कृषि, सहकारी, उद्योग तथा वाणिज्य, पर्यटन, पशु विकास, वडा विकास, राजश्व परिचालन अभिवृद्धि र रोजगारी सिर्जना तथा स्वरोजगार कार्यक्रम अनुरुप बजेट विनियोजन गरेको छ । त्यसैगरी सामाजिक विकास क्षेत्र तर्फ शिक्षा विकास, युवा विकास, खेलकुद विकास, स्वास्थ्य, महिला विकास, गरिवी निवारण कार्यक्रम, भुमि व्यवस्था निति तथा कार्यक्रमा बजेट छुट्याईएको छ ।
सभा मार्फत भौतिक पूर्वाधार विकास क्षेत्र तर्फ घरनक्सा पास, बन तथा वातावरण संरक्षण, विपद् व्यवस्थापन, फोहोर मैला व्यवस्थापन, उर्जा विकास, सुशासन अभिवृद्धि, संस्थागत विकास र न्याय तथा मेलमिलापलाई रकम विनियोजना गरिएको जनाईएको थियो । सुन्तलाको शहर, एक टोल एक नर्सरी, एक घर एक करेसाबारी, त्रिवेणी धाम, उद्यमशिलता, रोजगारी र उत्पादन वृद्धि, हुन्छ नगरपालिकाको समृद्धि, पुतलीबजार नगर उज्यालो शहर र स्वच्छ पुतलीबजार कार्यक्रमलाई प्राथमीकतामा राखी बजेट प्रस्तुत भएको छ ।
नगरसभामा पुतलीबजार नगरपालिकाका नगर प्रवक्ता ख्यामनारायण अधिकारीले वन तथा वातारण व्यवस्थापन सम्बन्धमा व्यवस्था गर्न बनेको विधेयक प्रस्तुत गरेका छन्। सुशासन समितिका संयोजक ओमबहादुर खड्काले कर्मचारीहरुको व्यवस्थापन गर्न बनेको बिधेयक, लेखा समितिका संयोजक रविविक्रम केसीले लेखा समितिको प्रतिवेदन र भौतिक पूर्वाधार व्यवस्थापन समितिका संयोजक अमृत श्रेष्ठले स्थानीय सडक मापदण्ड बारेकोे प्रतिवेदन प्रस्तुत गरेका छन् ।
बजेट बाहेकका प्रतिवेदनलाई नगर सभाले पारित गरेको छ ।
बजेट पास भएन
बजेट बिनियोजनमा पक्षपात गरिएको र वडासभाबाट पास भएका योजना पनि समावेश नगरिएको भन्दै नेपाली कांंग्रेस समर्थित सदस्यहरुले कार्यक्रम बहिस्कार भन्दैै नगरसभाबाट बाहिरिएका थिए।
सदस्यहरुको असन्तुष्टिप्रति नगरप्रमुखले आफुहरुलाई छलफलका लागि बोलाएको र भोली (शुक्रवार) बिहान प्रमुखसंगको छलफल गरिने पुतलीबजार नगरपालिकाका वडा अध्यक्ष रामचन्द्र रेग्मीले जानकारी दिए ।
नीति तथा कार्यक्रममाथि पुतलीबजार नगरपालिका १ का सदस्य विष्णुकुमार श्रेष्ठ, १० का सदस्य सुरज अधिकारी, ८ का वडा सदस्य इमानसेन ठकुरीले गुनासा एवं सुझाव दिएका थिए।
नगरसभामा नगरपालिकाका प्रमुख प्रशासकिय अधिकृत पुरुषोत्तम नेपालले सहजीकरण गर्नुभएको थियो ।