काठमाडौं २८ साउन । लुम्बिनी प्रदेशका मुख्यमन्त्रीमा कुल प्रसाद केसी नियुक्त हुनुभएको छ ।
नेकपा माओवादी केन्द्रका संसदीय दलका नेतासमेत रहनुभएका नेता केसी मुख्यमन्त्री नियुक्त हुनुभएको हो ।
प्रदेश प्रमुख अमिक शेरचनले संविधानको धारा १६८ को २ अनुसार उहाँलाई मुख्यमन्त्री नियुक्त गर्नुभएको हो । यसअघि, लुम्बिनी प्रदेश सरकारमा दाबी गर्दै चार दलीय गठबन्धनले ४२ जना सांसदको हस्ताक्षर प्रदेश प्रमुख अमिक शेरचनलाई बुझाएको थियो ।
मुख्यमन्त्री केसीले आजै शपथ ग्रहण गरेर सानो आकारको मन्त्रिपरिषद गठन गर्ने तयारी गर्नुभएको छ ।
को हुन् केसी ?
नेकपा माओवादीका प्रदेश संसदीय दलका नेता केसी पार्टीभित्र ‘सोनाम’ उपनामले चिनिन्छन् । रोल्पा जिल्लास्थित रोल्पा नगरपालिका–६ जिवाङ निवासी उनी २०२७ साल माघ १० जन्मिएका हुन् । जनयुद्धकै समयदेखि उहा माओवादीमा रहेर राजनीतिक रुपमा क्रियाशील हुनुहुन्छ ।
केसीले २०४३ सालमा कक्षा ७ मा पढ्दादेखि नै मसालको विद्यार्थी संगठन अनेरास्ववियुको सदस्यता लिनुभएको थियो । उहा २०४६ सालमा अखिलको जिल्ला सचिव बन्नुभयो।
२०४८ सालमा प्राथमिक तहको शिक्षक उहा २०५० सालमा तत्कालीन प्रधानमन्त्री गिरिजाप्रसाद कोइरालाको रोल्पा भ्रमण हुँदा कालो झण्डा प्रदर्शन गरेबापत शिक्षक पेसाबाट बर्खास्त हुनुभएको थियो ।
२०५५ सालमा केसीले नेपाल कम्युनिष्ट पार्टी ९माओवादी०को दाङ, प्युठान र सल्यान जिल्ला सेक्रेटरीका रुपमा जिम्मेवारीमा हुनुहुन्थ्यो । २०५७ सालमा पार्टीको भेरी–कर्णाली क्षेत्रीय ब्यूरो सदस्य भएका उनले पार्टी संगठन निर्माण तथा विस्तारका साथै जनसेनाको प्लाटुन कमिसार हुनुभयो ।
२०५७ सालमा उहा पार्टीको पोलिटब्यूरो सदस्य र केन्द्रीय सदस्य हुनुभयो। केही समय भारतमा जेल जीवन बिताउनुभएका उहा २०६३ साउन २५ गते भारतीय जेलबाट रिहा हुनुभयो।
वैद्य छाडेर प्रचण्डतिर
माओवादी विभाजन भएपछि केही समय उहा मोहन वैद्य नेतृत्वको माओवादी क्रान्तिकारीमा बस्नुभयो । उहा दोस्रो संविधानसभा बहिष्कार अभियानमा वैद्यसँगै लाग्नुभयो । तर, रामबहादुर थापा ‘बादल’सँगै उहा पुनः माओवादी केन्द्रमै फर्किनुभयो । बादल अहिले एमालेमा तर, कुलप्रसादले भने बादलको साथ छाडेर प्रचण्डको मूलधारमै फर्किनुभयो ।
२०७२ सालमा नेकपा ९माओवादी केन्द्र० को केन्द्रीय कार्यालय सदस्य हुनु भएका केसी २०७४ सालमा सम्पन्न प्रदेशसभा निर्वाचनमा रोल्पाबाट निर्वाचित हुनुभएको हो ।