स्याङजा, ५ भदौ । स्याङजामा उस्मान अलि बचाउ अभियानलाई जारी राखिएको छ । जिल्ला स्थित मुस्लिम समुदायका युवा युवतीले अभियानलाई जारी राखेका हुन । उस्मानको उपचारका लागि अभियानकर्ताहरुले स्वतस्र्फुत दानको अपेक्षा गरेका छन् । आ आफना क्षमता र दक्षता अनुरुप दान गरेर उस्मानको उपचारमा सहयोग गर्न उनीहरुको आग्रह हो ।
तनहुँको शुक्लागण्डकी नगरपालिका–५ निवासी ९ महिने बालक उस्मान अलीको उपचारका लागि धेरै रकम लाग्ने भएपछि सबै जिल्लामा यस्तै सहयोगका अभियान संचालन गरिएका छन । विश्वकै दुर्लभ रोगमध्येको एसएमए (मस्कुलर एट्रोफी) रोगबाट ग्रसित बालकको उपचारका लागि सहयोग संकलन सुरु गरेको सातादिनमा बालकको हालसम्म करिब ४ लाख सङ्कलन भइसकेको स्याङजा मुस्लिम युवा क्लबका अध्यक्ष सागिर अलिले जानकारी दिनुभयो ।
उपचारका लागि सबै क्षेत्रबाट सक्रिय भएर आर्थिक सङ्कलन कार्य भइरहेको छ । उक्त रोगको उपचार नेपालमा नहुने र उपचारका लागि विदेश लैजानुपर्ने हुँदा खर्चिलो हुने बताइएको छ । यस रोगको उपचारका लागि जोल्जेन्स्मा नामक औषधि दिइने र यो औषधि विश्वकै महँगो पर्ने बताइएको छ । विश्व बजारमा यसको मूल्य अमेरिकी २ दशमलब १ मिलियन डलर अर्थात् झण्डै नेपाली रुपैंया २६ करोड पर्ने हुँदा यसको उपचार सामान्य नेपालीको पहुँचभन्दा बाहिर छ ।
यसैले जिल्लाबासी युवायुवती तथा देश विदेशमा रहेका नेपालीको सक्रियतामा उक्त रकम सङ्कलन गर्नु आवश्यक छ । एका÷दुई ब्यक्तिबाट संकलित रकमले उपचारमा संभव देखिदैन । त्यसैले सबैले थोपा थोपा रकम संकलन गरेर उस्मान उपचारको अभियानमा जोड दिइएको स्याङजा बाडखोला मुस्लिम समाजका अध्यक्ष हाजी शेर अलीले जानकारी दिनुभयो ।
यसैक्रममा स्याङजा र स्याङजाबाट विदेशमा जानेहरुले समेत उपचारका लागि सहयोग गर्दै आउनुभएको छ । यसैगरी, स्याङजा घरभई रोजगारका लागि यूकेमा रहनु भएका रहिमदिन अलिले ५० हजार, नुवाकोट घर र स्याङजा ससुराली भएका जमिल खान र उनका पत्नी (सबिना निशा) ले २६ हजार, क्यानडामा रहनुहुने अस्लम अलिले २० हजार र अर्जुन मरासीनीले १० हजार रुपैंया ब्यक्तिगत सहयोग गर्नुभएको छ ।
यस्तै, स्याङजा जिल्ला उद्योग वाणिज्य संघ परिवारबाट २२ हजार ५० रुपैंया, लायन्स क्लव अफ स्याङजाले १५ हजार , स्कुल अफ डेमोक्रेसीले १५ हजार रुपैंया उपलब्ध गराउनु भएको छ ।