स्याङ्जा १ साउन । नेकपा एमाले स्याङ्जाले गल्याङ् नगरपालिकाका निवर्तमान प्रमुख भूपराज अधिकारीलाई ६ महिनाका लागि निलम्बन गर्ने निर्णय गरेको छ। स्थानीयतह निर्वाचनमा अधिकारीमाथि पार्टीलाई अन्तरघातगरी आफना उम्मेदवारलाई पराजित गरेको आरोप लगाइएको छ।
नेकपा एमाले अध्यक्ष सूर्यप्रसाद गैह्रे (पारस) का अनुसार २ पटकसम्म सोधिएको स्पष्टिकरणको जवाफ नदिएकाले अधिकारीलाई पार्टीका जिम्मेवारीवाट ६ महिनाका लागि निलम्बन गर्ने निर्णय भएको जनाइएको छ। असार २० गते ३ दिनभित्र र असार २८ गते २ दिनभित्र स्पष्टीकरण दिनका लागि समय तोकेको थियो।
अधिकारीमाथि बिभिन्न ९ वटा मुख्य बुँदामा केन्द्रितरही स्पष्टिकरण सोधिएको छ। निर्वाचनका बेला निर्णायक भूमिका नखेलेको, चुनावी अभियानका क्रममा सहभागी नभएको, बिरोधीसंग साँठगाँठ गरेको र आफना उम्मेदवारलाई हराउन लागेको, विपक्षी दलसंग रकम लिएको, आफना पार्टीका उम्मेदवार हराउने अभियानमा जुटेको, कार्यकर्ता भड्काएको, केन्द्रिय अध्यक्ष केपी ओली र जिल्लाका नेता एवं केन्द्रिय सचिव पदमा अर्याललाई अमर्यादित शब्द र गालीगलौच गरेको लगायतका बिबिध आरोप सहित निर्वाचनमा नगरप्रमुख र उपप्रमुखलाई हराउनु पर्ने कारणका बारेमा स्पष्टिकरण सोधिदा समेत अधिकारीले लिखित वा मौखिक कुनै किसिमको पनि प्रतिक्रिया नजनाएकाले कारवाही गरिएको अध्यक्ष गैह्रेको भनाई छ।
जिल्ला अध्यक्ष समेत रहेको गैहेलाई नगरप्रमुखको उम्मेदवार हुने टिकट पाएपछि निवर्तमान प्रमुख अधिकारी असन्तुष्ट भएको एमाले बृत्तमा चर्चा छ। एमाले तर्फबाट उम्मेदवार बनेका गैह्रे नेपाली काँग्रेसका गुरुप्रसाद भट्टराईसँग पराजित भएका हुन। भट्टराई नेपाली कांग्रेसका जिल्ला सचिव हुन। एमाले जिल्ला अध्यक्ष र कांग्रेस जिल्ला सचिवबीच नगरप्रमुख पदमा प्रतिस्पर्धा भएको थियो।
भट्टराईले ९ हजार ६२१ मत ल्याउनु पाउदा गैह्रेले ८ हजार ९२२ मत ल्याएका थिए। २०७४ सालको चुनावमा प्रमुख र उपप्रमुख एमालेले जितेको थियो। अहिले भने दुबै पद नेपाली कांग्रेसले जितेको छ। गल्याङ्लाई एमालेको राम्रो पकड क्षेत्र मानिन्छ।
तत्कालिन प्रधानमन्त्री केपी शर्मा ओलीले संसद बिघटनपछि एकिकृत समाजवादीको सचिब भएका उनलाई पुनः नगर प्रमुखको टिकट दिने केन्द्रिय नेताको आश्वासन दिएपछि एमालेमा फर्कनु भएको स्रोतले जनाएको छ । गतबर्ष सम्पन्न पार्टीको जिल्ला अधिवेशनमा पनि उहा सचिव पदमा पराजित हुनुभएको थियो ।
