स्याङ्जा १५ भदौ । कालीगण्डकी गाउँपालिकाले गतसातादेखि केरा र केराबाट बन्ने परिकारका खाजा खान सुरु गरेको छ ।
गाउँपालिकाले केरा खेती विस्तारसंगै किसानलाई प्रोत्साहन गर्ने उदेश्यले प्रत्येक साताको एक दिन बुधवार केरा र केराबाट बन्ने परिकारको खाजा खाने नियम बनाइएको गाउँपालिकाका अध्यक्ष खिम थापाले जानकारी दिनुभयो ।
सो नियम गाउँपालिकाको कार्यालय, वडा कार्यालयहरु, विद्यालयहरु लगायतलाई दिवा खाजाका लागि केरा र यसबाट बनाईने जुनसुकै परिकारको प्रयोगलाई अनिवार्य गर्नेगरी साउन मसान्तका दिन पालिका बैठकले निर्णय गरेको छ।
भदौ महिनाको पहिलो बुधवारका दिन गाउँपालिकाको र कालीगण्डकी अस्पतालको चमेना गृहबाट सुरु गर्ने निर्णय भएको थियो। सोही बमोजिम यी दुबै ठाउँमा केराबाट बनेका मःम, र पकौडा खाएर सुरुवात गरिएको पालिका अध्यक्ष थापाको भनाई छ।
यसैगरी, अब बिद्यालय, वडा र अन्य सरोकारवाला सबैले दिवा खाजाका लागि केरा र केरावाट बनाईने जुनसुकै परिकार खान र खुवाउनु पर्नेछ। केराबाट, केराको फल, सेल रोटी, चुकौनी, ससेज, मःम, पकौडा, फ्राइृ, तारेर, आचार, तरकारी लगायतका धेरै परिकार बनाउन सकिन्छ।
गाउँपालिकाले पालिकामा उत्पादित केराको बजारीकरण र प्रवद्र्धनमा जोड दिदै यहाँ उत्पादित केरालाई यही खपतको अभियान संचालन गरेको प्रमुख प्रशासकिय अधिकृत देवेन्द्र पाण्डे भन्नुहुन्छ ।
केराको उत्पादन लिएसंगै खेरा जाने सामाग्रीको उपयोग गर्दै घरेलु सामाग्री बनाउन सिकाएको छ। स्थानीय रोजगारसंग जोडिएका छन्। केराको जुस, चप्पल, चकटी, बस्ने कुसन, गलैचा, मोडा, खादा, धागो, टपरी बनाउने र रोजगार दिने योजना अगाडि बढाएको छ ।
गाउँपालिका ९० जना किसान सहित ३ विद्यालयलाई जी–९ र झापाली मालभोग जातका २० हजार केराका बिरुवा उपलब्ध गराइएको उपाध्यक्ष सावित्रा कोइरालाले जानकारी दिनुभयो ।
पालिकाले प्रत्यक्ष–अप्रत्यक्षगरी झण्डै ९ सय बढीलाई रोजगार दिनेगरी योजना अघि सारेको जनाएको छ।