स्याङ्जा ६ साउन । नेपालका प्रथम जननिर्वाचित प्रधानमन्त्री तथा नेपाली काँंग्रेसका संस्थापक विपी कोइरालाको ४१ औ स्मृति दिवस आज विभिन्न कार्यक्रम गरी मनाइँदैछ ।
वि सं १९७१ भदौ २४ गते भारतको बनारसमा जन्मिनु भएका वीपीको २०३९ साल साउन ६ गते अर्थात् आजकै दिन निधन भएको थियो । उहालाई घाँटीको क्यान्सर थियो । २०१५ सालमा भएको आमनिर्वाचनमा बहुमत ल्याएपछि उहा पहिलो जननिर्वाचित प्रधानमन्त्री बन्नुभएको थियो । तत्कालिन राजा महेन्द्रले निर्वाचित सरकारलाई बर्खास्त गरेपछि भारतमा निर्वासित वीपी २०३३ सालमा राष्ट्रिय मेलमिलापको नीति लिएर स्वदेश फर्किनु भएको थियो ।
सिद्धान्तनिष्ठ र अटल राष्ट्रवादका धनी वीपी साहित्यमा अराजक र राजनीतिमा व्यवहारवादी हुनुहुन्थ्यो । उत्पीडन, कठोर यातना र अत्यन्त कठीन अवस्थामा पनि राष्ट्रियता र प्रजातन्त्रप्रतिको आधारभूत निष्ठालाई नत्याग्ने बीपीले जीवनभर देश र जनताकै लागि संघर्ष गर्नुभयो ।
वि सं २००७ सालको क्रान्तिका योद्धा वीपीले तत्कालीन राजा महेन्द्रसँगको लडाइँमा गरिने आन्दोलनमा शान्तिपूर्ण क्रान्तिको बाटो रोज्नु भएको थियो । २००३ सालमा नेपाली राष्ट्रिय कांग्रेस स्थापना गरेपछि उहा भारतीय स्वतन्त्रता आन्दोलनमा समेत संलग्न हुनुभयो ।
कोइरालालाई अपदस्थ गरी २०१७ सालमा राजा महेन्द्रले निरंकुश पञ्चायती व्यवस्था लागु गरेपछि थुप्रै वर्ष उहाले जेल जीवन बिताउनुभयो ।
२०१५ सालमा पहिलो जननिर्वाचित प्रधानमन्त्रीका रुपमा वीपीले अंगिकार गरेको आर्थिक सुधार र परिवर्तनको बाटो लोकप्रिय भइरहेकै बेला तत्कालीन राजा महेन्द्रले सैनिक सहयोगमा वीपीलाई अपदस्थ गरी शासन व्यवस्था आफ्नै हातमा लिनु भएको थियो ।
आफ्नो आस्था, आदर्श र सिद्धान्तबाट कहिल्यै पछि नहट्ने एक महान् राष्ट्रवादी चिन्तक स्वर्गीय कोइराला नेपाली राजनीतिमा मात्र नभई साहित्यका फाँटमा पनि त्यतिकै चर्चित छन् ।
कोइरालाका आत्मकथा, जेल जीवन, दोषी चस्मा, हिटलर र यहूदी, सुम्निमा, मोदीआइन, श्वेत भैरवी, तीन घुम्ती, नरेन्द्र दाई लगायतका थुप्रै बहुचर्चित कृति प्रकाशित छन् ।
यसैगरी, वीपी स्मृति दिवसको अवसर पारेर स्याङ्जाका ११ वटै पालिकाले विभिन्न कार्यक्रमगरी मनाउने भएको नेपाली कांग्रेस जिल्ला कार्यसमिति स्याङ्जाले जनाएको छ ।