स्याङ्जा १ जेठ । नेपाली कांग्रेस स्याङ्जाका अग्रज नेता प्रजातन्त्र सेनानी खगेन्द्रराज रेग्मीको मंगलबार बिहान ७५ बर्षको उमेरमा निधन भएको छ। स्याङ्जा कांग्रेसका पूर्वसभापति एवं पूर्व सांसद पनि ।
झण्डै २ बर्षअघिदेखि उपचारमा रहनु भएका रेग्मीको मंगलबार बिहान ५ बजे आफ्नै घर भीरकोट नगरपालिका ७ गेझवासमा निधन भएको हो । कांग्रेसका ३ पटक सभापति र राष्ट्रिय सभा सदस्य भएर स्याङ्जा र मुलुकका लागि योगदान पुरयाउनु भएको छ ।
जिब्रोको क्यान्सर उपचारमा रहनु भएका उहाँ एक साताअघि घर फर्कनु भएको थियो । भरतपुर र काठमाडौंमा उपचारपछि चिकित्सकको सल्लाह र उनको ईच्छा बमोजिम घर फर्कनु भएको हो ।
लामो समय शिक्षण पेसामा आबद्ध रेग्मी राजनीतिमा पनि उत्तिकै क्रियाशील रहनुभयो । जसका कारण उहाका हजारौं चेला छन्। लोकप्रिय नेताका रुपमा पहिचान बनाउन सफल हुनुहुन्छ । राजा महेन्द्रले बिपी कोइराला नेतृत्वको जननिर्वाचित सरकारलाई २०१७ पुस १ गते अपदस्थ गरेपछि रेग्मी राजनीतितर्फ आकर्षित हुनुभएको थियो । वीपीसंगै निर्वासनमा बसेर काम गर्नुभयो स्याङ्जालाई कांग्रेसमय बनाउने अभियानमा उहा निरन्तर क्रियाशिल रहनुभयो । गाउँगाउँमा पुगेर संगठन बिस्तार र बलियो बनाउने अभियानमा अहोरात्र खटिने गरेको उहाका सहयात्री श्रीप्रसाद घर्ति भन्नुहुन्छ ।
सशस्त्र द्वन्द्वका बेला उनलाई माओवादीले गोली हानी घाइते बनाएका थिए । २०५८ माघ महिनामा उहामाथि माओवादीले गोली हाने र घाईते बनाए । मुलुकमा प्रजातन्त्र स्थापनाका लागि होमिएकै कारण उहा पटकपटक जेल जीवन बिताउनु भएको छ । पिता देवीप्रसाद र आमा नोनाकुमारीबाट जन्मेका १३ सन्तानमध्ये उहा तेस्रो सन्तान । किसान परिवारमा वि.स. २००६ साल साउन १५ गते नागपञ्चमीका राती जन्मनु भएका उहाका अहिले एक पत्नी हुनुहुन्छ ।
आफनो राजनीतिक एवं सामाजिक यात्रालाई समेट्दै उहाले ‘मेरो जीवनयात्रा यातना पीडाको कथा’ पुस्तक सम्पादन एवं प्रकाशन गर्नुभएको छ । अन्तिम श्रद्धाञ्जलिका लागि शव बिहान ११ बजे पार्टी कार्यालय स्याङ्जामा राखिने जिल्ला सभापति राजु थापाले जानकारी दिनुभयो ।