स्याङेजा १० माघ । सिद्धार्थ राजमार्ग अन्र्तगत बुटवल पोखरा सडकखण्डलाई दुई लेन सडकमा स्तरोन्नति गर्नका लागी वातावरणीय प्रभाव मुल्यांकन प्रतिवेदन तयारीका लागी सार्वजानिक सुनुवाई कार्यक्रम गरिएको छ ।
भौतिक पुर्वाधार तथा यातायात मन्त्रालय सडक विभाग विकास सहायता कार्यान्वयन महाशाखाले पुतलीबजार नगरपालिका वडा नं. ११ स्थित करेन्डाडामा सार्वजनिक सुनुवाई गरेको हो । सुनुवाई कार्यक्रममा बोल्दै पुतलीबजार नगरप्रमुख तुलसीराम रेग्मीले दिर्घकालिन योजना अनुरुप अवको १०० बर्षका लागि पुग्नेगरी सडक बिस्तार गर्न सुझाव दिनुभयो । उहाले कम बिनासमा धेरै विकास हुनेगरी सडक निर्माण गर्नु पर्ने बताउदै खानेपानी, बनजंगल, जीवजन्तु लगायत वातावरणीय प्रभावका मूल्यांकन गर्दै उचित क्षतिपूर्ति उपलब्ध गराउनु पर्नेमा जोड दिनुभयो । राज्यसंग जग्गा किनेर घर बनाएका स्थानीयबासीलाई उचित क्षतिपूर्ति दिनु पर्ने उहाँको जोड थियो ।
कार्यक्रममा कांग्रेस नगर सभपाति सुरजकुमार अधिकारी, नेकपा एमालेका सचिवालय सदस्य यादवराज शर्मा, स्याङ्जा जिल्ला उद्योग वाणिज्य संघका वरिष्ठ उपाध्यक्ष हिक्मत श्रेष्ठ, सिद्धार्थ राजमार्ग अन्र्तगतका वडा अध्यक्षहरु, स्थानीय बासीन्दा लगायतले आ आफना धारणा सहित सिद्धार्थ राजमार्ग बिस्तारका आवश्यकताका बारेमा जिज्ञासा एवं सुझाव दिनु भएको थियो । कार्यालयले बुटवलदेखि पोखरासम्मका पालिकाहरुमा वातावरणीय मुल्यांकनका प्रतिवेदन तयारीका लागी सार्वजानिक सुनुवाई गर्दै आएको छ । यसैक्रममा गल्याङ, वालिङ्, भीरकोट र हिजो स्याङ्जामा सार्वजनिक कार्यक्रम गरिएको हो । कार्यक्रममा सहभागिहरुले सिद्धार्थ राजमार्ग स्याङ्जालीको लागी जीवन भएको भन्दै राजमार्ग फराकिलो पार्नका लागी आ–आफ्नो स्थानबाट कटिवद्ध भएर लाग्ने बताएका छन् । पटक पटक राजमार्ग फराकिलो पार्ने विषयहरु मात्रै उठान गर्नुभन्दा छिटै राजमार्ग फराकिलो पारी स्याङ्जाको भविष्य सुनिश्चित गर्नुपर्नेमा सहभागिले जोड दिएका छन् । लुम्बिनी र पोखराको बीचमा रहेको स्याङ्जालाई पर्यटनसंग जोडिनका लागी पनि राजमार्ग पहिलो खुड्किलो भएकाले राजमार्ग फराकिलो पार्नुपर्नेमा उनीहरुको सुझाव छ । साँघुरो र घुमाउरो राजमार्गले यहाँको पहिचानमा समेत प्रभाव पारेकाले यहाँको नागरिकको जिवन परिर्वतन गर्न र यहाँको विकास र समृद्धिका लागी पनि सिद्धार्थ राजमार्ग फराकिलो बनाउनुपर्ने सहभागिले जोड दिएका छन् ।
यसैगरी, स्थानीयका राय सुझाव संकलनगरी सम्बन्धित निकायसंग पुरयाउने र त्यसपछि राजमार्ग बिस्तारका योजना अघि बढाईने जनाइएको छ ।
