स्याङ्जा ९ कात्तिक । वालिङ भलिबल क्लबको आयोजनामा आजदेखि वालिङ खेलमैदानमा पुरुष र महिला भलिबल प्रतियोगिता शुरु भएको छ ।
भलिबल प्रतियोगिताको उद्घाटन गर्नुहुँदै गण्डकी प्रदेशका यूवा तथा खेलकूद मन्त्री राजीव गुरुङ (दीपक मनाङ्गे) ले खेल क्षेत्रको विकाससँगै खेलाडीको क्षमता अभिवृद्धि गर्नतर्फ ध्यान केन्द्रीत भएको बताउनुभएको छ । उहाँले खेलको गरिमालाई राष्ट्रिय तथा अन्तर्राष्ट्रिय जगतसम्म पु¥याउनुपर्नेमा जोड दिनुभयो ।
कार्यक्रममा गण्डकी प्रदेश सांसद एवं नेपाली काँग्रेस गण्डकी प्रदेश संसदीय दलका सचेतक भागवतप्रकाश मल्ल, वालिङ नगर प्रमुख दिलीपप्रताप खाँण, गण्डकी प्रदेश खेलकूद परिषदका उपाध्यक्ष धोजकुमार गुरुङ, नेपाली काँग्रेस क्षेत्र नं. २ प्रदेश क का सभापति अर्जुनप्रकाश अर्याल, खेलकूद विकास समिति स्याङ्जाका अध्यक्ष मोहन गुरुङ, आयोजक क्लबका आजीवन सदस्य मोहन गुरुङ, सुनिल खड्का लगायतले प्रतियोगिताको सफलताको शुभकामना ब्यक्त गर्नुभएको थियो ।
क्लबको दोस्रो वार्षिकोत्सवका अवसरमा शुरु भएको पुरुष तथा महिला भलिबल प्रतियोगिता कात्तिक १३ गतेसम्म सञ्चालन हुने छ । ६ दिनसम्म सञ्चालन हुने प्रतियोगिताको मुख्य प्रायोजकमा वालिङ नगरपालिका हो । क्लवका अध्यक्ष दीपेन्द्र मल्लको अध्यक्षतामा सम्पन्न कार्यक्रममा उपाध्यक्ष किरण खाँणले स्वागत एवं सचिव हुमराज गुरुङले संचालन गर्नुभएको थियो । प्रतियोगितामा पुरुषतर्फ १० समूह र महिलातर्फ ७ वटा समूह सहभागि छन् ।