स्याङ्जा २३ पुस । विरुवा गाउँपालिका ४ ओरष्टे मडकिना गोफामा श्री नारायणेश्वर शिव मन्दिर परिसरमा नवनिर्मित हवनकुण्ड तथा यज्ञशालाको उदघाटन गरिएको छ ।
गाउँपालिकाका अध्यक्ष सुर्य कुवर र हवनकुण्ड निर्माणका लागि सहयोगदाता स्थानीयबासी हाल यूकेमा बस्दै आउनु भएका दिलिप गुरुङ्ले उदघाटन गर्नुभएको हो ।
उदघाटन कार्यक्रमलाई सम्बोधन गर्दै गाउँपालिकाका अध्यक्ष कुवरले श्री १००८ माता चम्पागिरि महाराजको जन्मथलोलाई धार्मिक एवं पर्यटकीय क्षेत्र बनाउन आवश्यक पर्ने पूर्वाधार निर्माणका लागि पालिकाले आवश्यक सहयोग गर्ने बताउनुभयो । यसैगरी, गुरुङले आफनो जन्मथलोको विकासका लागि आगामी दिनमा समेत सहयोग गर्ने बताउनुभयो ।
कार्यक्रममा गाउँपालिकाका उपाध्यक्ष भगवती शर्मा, मन्दिर निर्माण ब्यवस्थापन समितिका उपाध्यक्ष धनप्रसाद गुरुङ, चम्पागिरी १००८ महाराजका शिष्यहरु रंगनाथ रेग्मी, नवराज सुवेदी लगायतले शुभकामना सहित आर्थिक सहयोग गर्ने बताउनुभयो । नारायणेश्वर शिव मन्दिर गुठी ब्यवस्थापन समितिका अध्यक्ष हेमप्रसाद गुरुङको अध्यक्षतामा सम्पन्न कार्यक्रममा सचिव रविन केसीले स्वागत एवं आजसम्म समितिले गरेका काम र प्रगती विवरण जानकारी गराउनु भएको थियो भने शिक्षक आर सी पोखरेलले कार्यक्रम संचालन गर्नुभएको थियो ।
यसैगरी, समाजसेवी दिलिप गुरूङ तथा धर्मपत्नी हिमा गुरूङले उपलब्ध गराउनु भएको १० लाख रूपैयाँले मन्दिर परिसरमा यज्ञशाला तथा हवनकुण्ड बनाइएको हो । सोही कार्यक्रममा समाजसेवी दिलिपकुमार गुरूङलाई सम्मान गरिएको थियो ।
सोही कार्यक्रममा वेलायतबाट आएका विदेशीको समूहले नगद ३ लाख र स्वास्थ्यकर्मी एवं माताका शिष्य रंगनाथ रेग्मीले नगद ५० हजार रुपैंया आर्थिक सहयोग प्रदान गर्नुभएको छ ।