स्याङ्जा १६ पुस । नेपाली कांग्रेस गण्डकी प्रदेश उपसभापति कल्पना तिवारीले संस्थापक नेता बीपी कोइरालाका बिचार र आदर्श आज पनि उत्तिकै आवश्यक र महत्वपूर्ण रहेको बताउनुभएको छ ।
नेपाली कांग्रेस स्याङ्जाद्धारा सोमबार पुतलीबजार नगरपालिका १ स्थित पार्टी कार्यालयमा आयोजित ४८ औं ‘राष्ट्रिय एकता तथा मेलमिलाप दिवस’ को अवसरमा बोल्दै सांसद तिवारीले वीपी बिचारलाई मर्न दिन नहुनेमा जोड दिनुभयो ।
धेरै कुरा बोल्ने, गर्ने भन्ने, आश्वासन बाड्ने तर ब्यवहारमा लागु नगर्ने जस्ता कार्यले आममानिसले वीपी र समाजवादको अनुभूत गर्न नपाएको भन्दै उहाले दुख ब्यक्त गर्नुभयो । नेपाली कांग्रेसका प्रदेश उपसभापति समेत रहनु भएका तिवारीले उत्पादनमा जोड दिन कृषिका क्षेत्रमा लगानी गर्न आवश्यक रहेको बताउनुभयो । संघिय लोकतान्त्रिक गणतन्त्रको संरक्षण गर्दै बिकासका बिभिन्न मोडल अघि बढाउनु पर्ने उहाको भनाई छ ।
कार्यक्रममा पूर्व सांसद शंकरप्रसाद पाण्डे, गण्डकी प्रदेश अर्थ विकास समितिका सभापति भोजराज अर्याल, पूर्वमन्त्री मेखलाल श्रेष्ठ, कांग्रेसका पूर्वसभापति विश्वप्रेम अधिकारी, पूर्व कार्यवाहक सभापति कुमार राना, स्तन्त्रता सेनानी तारापति सुवेदी र शालिकराम न्यौपाने, नेपाली कांग्रेस गण्डकी प्रदेश सदस्य धु्रव शर्मा पंगेनी, महासमिति सदस्य भरतप्रसाद लम्साल, प्रजातान्त्रिक विचार समाज गण्डकी प्रदेश संयोजक जीवलाल काफले, नेपाली कांग्रेस जिल्ला सदस्य इन्दिरा केसी, महाधिवेशन प्रतिनिधि धनकुमारी थापा, भीरकोट नगरप्रमुख गोबिन्दकुमार कर्माचार्य, आँधीखोला गाउँपालिका सभापति नरेन्द्र पौडेल, मुस्लिम संघ जिल्ला अध्यक्ष अलि मिया, तरुण दलका उपाध्यक्ष रविन केसी लगायतले सबै कांग्रेसी एकै मन मिलाएर अघि बढेमा नेपाली राजनीतिमा कुनै शक्ति र पार्टीले पनि बिचलन गराउन नसक्नेमा जोड दिदै आजैका दिनदेखि बलियो र एकढिक्का कांग्रेस बनाएर अघि बढ्नुको विकल्प नरहेको नेताहरुको भनाई छ ।
जिल्ला सभापति राजु थापाको सभापतित्वमा सम्पन्न कार्यक्रममा उपसभापति केदार काफलेले स्वागत एवं सचिव दामोदर लम्साल र सहसचिव धु्रववन्धु पौडेलले संचालन गर्नुभएको थियो ।
यसैगरी, सोही अवसरमा २ जना पत्रकार र २ संचार गृहलाई सम्मान गरिएको थियो । प्रेस यूनियन सदस्य युवराज पौडेल, प्रेस यूनियन गण्डकी प्रदेश सदस्य हिमाल न्यौपाने, आधीखोला रेडियोका संचार गृहका अध्यक्ष नेत्रप्रसाद पाण्डे सहित प्रमुख ब्यवस्थापक तोलाकान्त बगाले र हेर्ने कुरा डट कमका भूपराज बस्याललाई सम्मान गरिएको हो ।
वीपी कोइराला लगायतका नेता लामो निर्वासन अन्त्य गरी स्वदेश फर्किएको दिन पुस १६ गतेलाई हरेक वर्ष ‘राष्ट्रिय एकता तथा मेलमिलाप दिवस’का रुपमा मनाउँदै आएको छ ।