स्याङ्जा १८ चैत । विश्व बैंकको सहयोगमा निर्माण गरिने भएको प्रगतीनगर शिक्षाचोक ,गेउडाडा, आहालेडाड, कलियाथोक, बहाकोट, डाडाँस्वारा मोटर बाटोको अनुगमन सहित सरोकारवालाबीच अन्तरक्रिया गरिएको छ ।
विश्व बैंकको सहयोगमा नेपाल शहरी शासकीय तथा पूर्वाधार आयोजना सम्बन्धी पुतलीबजार नगरपालिका, विश्व बैकका प्रनिनिधी, उपभोक्ता समिति सहित सरोकारवालाबीच अन्र्तक्रिया एवं स्थलगत अनुगमन तथा निरीक्षण गरिएको हो ।
स्थलगत निरीक्षणपछि आयोजित छलफलमा बोल्दैै नगरप्रमुख तुलसीराम रेग्मीले मोटरबाटो लाई समयमै सम्पन्न गर्नेगरी काम गर्न सरोकारवालालाई सुझाव दिनुभयो । संघियतापछि जिल्लामै पहिलो पटक विश्व बैंकको सहयोगमा निर्माण गर्न लागिएको मोटरबाटोलाई गुणस्तर सहित समयमै सम्पन्न गर्न सकिएमा अन्य विकासे आयोजना समेत जिल्लामै भित्रयाउन सकिने उहाको भनाई छ ।
कार्यक्रममा विश्व विकास बैंकका आयोजना निर्देशक डा. युवराज पौडेलले बाटो निर्माणसंगै स्थानीय उपभोक्ता, नगरपालिका र सरोकारवालाबीच समन्वय गर्दै अघि बढ्नु पर्ने सुझाव दिनुभयो ।
यसैगरी, सोही कार्यक्रममा सहभागी अन्य वरिष्ठ इन्जिनियर एवं प्राबिधिकले वातावरणीय एवं सामाजिक प्रभावलाई समेत ध्यान दिनु पर्नेमा जोड दिदै छोटो समय रहेकाले समयको अत्यन्त ख्याल राख्दै निर्माणप्रति ध्यान दिनु पर्नेमा जोड दिएका छन ।
सोही कार्यक्रममा मोटर बाटो निर्माण उपभोक्ता समितिका अध्यक्ष भक्तबहादुर मल्ल, वडा नं. ९ का अध्यक्ष लीलप्रसाद गुरुङ, वडा नं. ८ का सदस्य टोलमाया थापा र गंगा नेपाली लगायतले ३० बर्षपछि पक्की मोटरबाटो बन्न लागेकोमा आफु लगायत स्थानीयबासिन्दा निकै खुशी भएको बताउनुभयो । उहाहरुले बाटो पक्की बनेसंगै बिभिन्न खालका रोजगारका बारेमा गाउमा छलफल चलेको समेत सुनाउनुभयो ।
बाटो निर्माणपछि पुतलीबजार र तनहुँको दुलेगौडासंग जोडिने छ । यसबाट पुतलीबजार नगरपालिकाका वडा नं. ३, ८, ९ का स्थानीयबासी प्रत्यक्ष लाभान्वित हुनेछन् भने सयौं ब्यक्तिले सो बाटोको उपयोग गर्न पाउनेछन् ।
प्रगतीनगर शिक्षा चोकदेखि काँफलडाँडा — भन्ज्याङ— बहाकोट— नाम्चे— काल्खुसम्म ७ दशमलब ६ किलोमीटर लम्बाईमा पक्की सडक सहित नाली र टेवा पर्खाल रहने र दुई लेनको सडकको चौडा ७ मिटरको हुने बताइएको छ ।
विश्व बैंकको ४३ करोड १८ लाखको लागतमा निर्माण गरिने पक्की सडक अबको १५ महिनाभित्र सक्नुपर्ने हुन्छ । नगरपालिकाले सडक निर्माणका लागि टेण्डर समेत खुलाई ठेक्का लामा कन्स्ट्रक्सनलाई परेको यसैसाता सम्झौता भई कामको थालनी सुरु हुने नगर प्रमुख रेग्मीले जानकारी दिनुभयो ।
नेपाल शहरी शासकिय तथा पूर्वाधार कार्यक्रम अन्र्तगत विश्व बैंकको ऋण तथा अनुदान सहयोग तथा पुतलीबजार नगरपालिकाको प्राबिधिक सहयोगमा पक्की सडक बनाईने भएको फोकल पर्सन इन्जिनियर गोविन्द दोरंगााले जानकारी दिनुभयो ।
पुतलीबजार नगरपालिका, विश्व बैंकका प्रतिनिधि सहित सरोकारवालाको समूहले पनि यसअघि पनि पटक पटक स्थलगत निरिक्षण, अनुगमन सहित स्थानीयबासी र सरोकारवालाबीच छलफल गर्दे आएको छ ।