स्याङ्जा २९ माघ । पुतलीबजार नगर स्तरीय राष्ट्रपति कपको उपाधी त्रिभुवन आदर्श नमूना माध्यमिक बिद्यालयले हात पारेको छ। उपाधीसंगै बिद्यालयले रनिङ सिल्ड सहित बिभिन्न प्रतिस्पर्धाका पदक प्राप्त गरेको छ।
पुतलीबजार नगरपालिका १ स्थित मालेबगर खेलमैदानमा यही माघ २५ गतेदेखि पाँचौ राष्ट्रपति रनिङ सिल्ड प्रतियोगिता सुरु भएको थियो। प्रतियोगितामा सदरमुकाम अर्थात पुतलीबजार नगरपालिका १ स्थित त्रिभुवन माविले २६ अंक सहित प्रथम भएको छ भने २५ अंक सहित ज्योती आवासिय मावि द्धित्तिय भएको छ।
यसैगरी, पुतलीबजार नगरपालिका ६ स्थित हिमालयन मावि टक्सार २३ अंक सहित तृतीय भएको छ भने पुतलीबजार २ स्थित रोशनी आवासिय मावि १९ अंक सहित सान्त्वना भएको खेल प्रतियोगिता संचालन समितिका संयोजक बाबुराम बरालले जानकारी दिनुभयो ।
विजयी बिद्यार्थीलाई नगरप्रमुख तुलसीराम रेग्मीले सिल्ड, ट्रफी, प्रमाणपत्र प्रदान गर्दै अध्ययनसंग संगै खेलकूद पनि नियमित गर्नुपर्ने बताउनुभयो । बालबालिकाको शारिरीक एवं मानसिक स्वस्थ्यताका लागि आगामी दिनमा समायानुकुलन खेल प्रतियोगिता र आवश्यकता अनुरुपका खेलमैदानको पूर्वाधार विकास गर्ने प्रतिवद्धता जनाउनुभयो ।
नगर भित्रका ३६ वटा बिद्यालय सहभागी रहेको प्रतियोगितामा बिभिन्न १५ बिधाका प्रतियोगि खेलमा छात्र छात्राले प्रतिस्पर्धा गरेको खेल समितिका अर्का सदस्य रामकाजी थापाले जानकारी दिनुभयो ।
