स्याङ्जा १२ मंसिर । निर्वाचन आयोगको अर्कमण्यताका कारण स्याङ्जा क्षेत्र नम्वर २ का मतदाताहरु असन्तुष्टि देखिएका छन् ।
मंसिर ४ गते सम्पन्न भएको मतदानको मतगणना प्रारम्भ वा पुनमतदानको बिषयमा ढिलाई गरिदिदा मतदाताहरुमा असन्तुष्टि बढेको हो । बिशेषगरी नेपाली काँग्रेसले बुथ कब्जागरी मतदान गरेको आरोप लगाएर नेकपा एमालेले पुन मतदानको माग गरेपछि उल्झिएको विवाद भएको हो ।
नेपाली काँग्रेसले शान्तिपुर्ण रुपमा मतदान प्रक्रिया सम्पन्न भएको र मतपेटीका निर्वाचन कार्यालयमा बुझाएसकेकाले तुरुन्त मतगणना गर्न माग गरिरहेको छ । ९ दिनदेखी दुवैदलको आन्दोलन जारी छ । यसै बिषयलाई लिएर स्याङ्जा निर्वाचन क्षेत्र २ को मतगणना रोकिएको बिषयमा एक निर्वाचन आयुक्तले गम्भिर ध्यानाकर्षण गरेका छन् ।
मतदान प्रक्रियामा कुनै हुलहुज्जत नभई शान्पिुर्वक सम्पन्न भई आउदा पनि मतगणना ढिलो हुँदा मतदातामा वितृष्णा पैदा हुने भन्दै निर्वाचन आयुक्त इश्वरी प्रसाद पौडेलले फरक मत राख्दै गम्भिर बिषय उठान गर्नुभएको खबर प्राप्त भएको छ । मतदान अधिकृतबाट मतदान स्थलमा कुनै हुलहुज्जत लगायतका अवान्छित् गतिविधि भएको छ भनी निर्वाचन अधिकृतलाई कुनै प्रतिवेदन नदिएको र मतपेटीका कानुनी प्रक्रिया पुरागरी कातजातसहित निर्वाचन अधिकृतलाई बुझाइएको छ आयुक्त पौडेलले भन्नुभयो ।
प्रतिनिधिसभा निर्वाचन ऐन, २०७४ को दफा ४५ र दफा ४६ को अवस्था उपरोक्त मदानकेन्द्रहरुमा विद्यमान नरहेको भनी निर्वाचन अधिकृतको कार्यालयबाट लेखी आएकाले मतगणना रोकिनु दुखद भएको पौडेलको भनाई छ ।
आयुक्त पौडेलले प्रमुख निर्वाचन आयुक्त दिनेशकुमार थपलिया, निर्वाचन आयुक्तहरु रामप्रसाद भण्डारी, डा. जानकी कुमारी तुलाधर र सगुन समशेर ज.व.रा.ले गरेको फरकमतमा आयोगबाट छानविन गर्न पठाउदा नेपाल सरकारको आर्थिक स्रोत खेर जाने र मतगणना कार्य ढिलो हुदा निर्वाचन प्रति मतदाताको वितृष्णा पैदा हुने बताउनु भएको छ ।
निर्वाचन अधिकृतको कार्यालय स्याङ्जा जिल्ला प्रतिनिधिसभा निर्वाचन क्षेत्र २ को कार्यालयले शान्तिपुर्ण मतदान सम्पन्न र सबै मतपेटीका सकुशल कार्यालयमा आएको प्रतिवेदन बुझाएको छ ।
