स्याङ्जा ३० असोज । तिहार नजिकिदै गर्दा कालीगण्डकी गाउँपालिका भने सयपत्रीमय बनेको छ। गतबर्षदेखि सयपत्री फूल रोप्दै आएको पालिकाले यसबर्ष भने ५० रोपनी जग्गामा कर्मा ५५५ जातको सयपत्री फुलखेती गरेर झनै शौन्दर्यता बढाएको छ।
पालिकालाई सयपत्रीको फूल माफर्त ब्यावसायिकता एवं पहिचान दिलाउने उदेश्यले गाउँपालिकाले गतवर्ष पालिकाले नै फूल खेती सुरु गरेको हो। अघिल्लो बर्ष पहिलो पटकमै फूलबाटै राम्रो उत्पादन भएपछि यसवर्ष यहाँका किसानलाई थप अनुदान दिएर फूलखेती गर्न थालिएको गाउँपालिकाका अध्यक्ष खिमबहादुर थापाले जानकारी दिनुभयो ।
उनका अनुसार ‘गतबर्ष फूलखेतीबाटै झण्डै ८ लाख रुपैंया आम्दानी भएको थियो।’ गतबर्ष १५ रोपनी जग्गामा ड्रागन फ्रुटसंगै फूल खेती गरिएको थियो।
यसबर्ष गाउँपालिकाले १५ र कृषक समूह तथा व्यक्तिकागरी ३५ रोपनीमा सयपत्री फूलखेती गरिएको छ। व्यावसायिक किसान बढाउन पालिकाले ५० प्रतिशत अनुदान उपलब्ध गराएको छ। गाउँपालिका — ४ बिर्घामा १५ रोपनी जग्गामा नर्सरी बनाइएको छ। पालिकाभित्रका फूल रोप्ने किसानले यही प्रशिक्षण दिईने गरिएको छ।
तीस भन्दा बढी किसानले ब्यवसायिकरुपमा फूलखेतीलाई अघि बढाउने जनाएका छन्। समूह तथा व्यक्तिले २ देखि ५ रोपनीसम्म जग्गामा व्यावसायिक फूलखेती भने गर्नुपर्नेछ।
जग्गा खनजोतदेखि फूल फुल्ने अवधिसम्मका लागि पालिकाले प्रतिरोपनी ९ हजार रुपैंया समेत उपलब्ध गराएको छ।
यहाँ उत्पादित फूलको किसानले आफैंले बिक्री बितरण तथा उपयोग गर्न सक्नेछन्। तर, बजार नपाएमा पालिकाले नै खरिदको जिम्मा लिएको छ। पालिकामा घरबास (होमस्टे) पनि संचालनमा छ।
बीउ जमाएको ९० दिनमा फूल फुल्छ। विशेषगरी दशैं तिहारलाई लक्षित गरेर फूलखेती सुरु गरिएको हो। दशैं भन्दा तिहारका बेला सयपत्री फूलको माग बढी हुनेगर्छ। एउटा बोटमा पटक पटकगरी २ सय वटा भन्दा बढी फूल फल्छ। यी फूलहरु चैत महिनासम्म रहने बताइएको छ।
तिहार लगायतका चाडबाड र खुशीयाली नजिकिदै गर्दा धेरै रकम बाहिर गइरहेका बेला कालीगण्डकी गाउँपालिकाले खाली र बाँझा जग्गाजमिनको समेत उपयोग गर्दै सहजरुपमा राम्रो नगद आर्जन गर्न सकिने रहेछ भनेर प्रमाणित गरिसकेको बताउनुहुन्छ गाउँपालिकाका अध्यक्ष खिम थापा।
अघिल्ला बर्षहरुमा बिभिन्न शहरबाट फूलमाला मगाउनु पर्ने वाध्यता हटेको छ। गतबर्ष पोखरा, नारायणघाट, पाल्पा, काठमाण्डौं लगायतका बिभिन्न शहरका माग बमोजिम यहाँका फूलमाला निर्यात गरिएको थियो।
