स्याङ्जा ४ असार । तथ्यांक कार्यालय स्याङ्जाले राष्ट्रिय जनगणना २०७८ को नतिजा सार्वजनिक गरेको छ । जिल्ला प्रशासन कार्यालयमा आयोजित जिल्ला स्तरीय नतिजा सार्वजनिक कार्यक्रममा जिल्ला स्थित ११ वटै पालिकाको सहभागिता थियो ।
कार्यक्रममा बोल्दै जिल्ला समन्वय समिति स्याङ्जाका प्रमुख श्रीप्रसाद जिटीले सहि तथ्यांकले मात्र योजना निती निर्माण र बजेटको सदुपयोग हुदै लक्ष्य प्राप्तिमा सहयोग पुग्ने बताउनुभयो ।
पुतलीबजार नगरप्रमुख तुलसीराम रेग्मी, प्रमुख जिल्ला अधिकारी शशीधर घिमिरे, फेदिखोला गाउँपालिकाका अध्यक्ष घनश्याम सुवेदी लगायतले जुनसुकै कार्यका लागि पनि सही तथ्यांक आवश्यक पर्ने हुदा वास्तविक तथ्यांक आउनु पर्नेमा जोड दिनुभयो ।
यसैगरी, नतिजा बारे जानकारी गराउदै तथ्यांक कार्यालय प्रमुख शारदा शर्माले स्याङ्जाको जनसंख्या २ लाख ५३ हजार २४ रहेको छ । ती मध्ये १ लाख ३६ हजार ३ सय ४६ महिला र एक लाख १६ हजार ६ सय ७८ पुरुष रहेको बताइएको छ ।
जनसंख्याको ५३ दशमलब ९ प्रतिशत महिला र ४६ दशमलब १ प्रतिशत पुरुष छन् । स्याङ्जाको जनसंख्या २०६८ को भन्दा १.२८ प्रतिशतले घटेको छ । दशबर्षअघि २ लाख ८९ हजार १४८ जनसंख्या रहेकोमा अहिले सार्वजनिक गणनामा २ लाख ५३ हजार २४ देखिएको छ ।
जनगणना २०७८ अनुसार, नेपालको जनसंख्या दुई करोड ९१ लाख ६४ हजार ५७८ रहेको छ। जसमा महिलाको संख्या एक करोड ४९ लाख ११ हजार २७ अर्थात् ५१.०२ प्रतिशत छ भने पुरुषको संख्या एक करोड ४२ लाख ५३ हजार ५५१ अर्थात् ४८.९८ प्रतिशत छ। त्यस्तै, अन्य लिङ्गीको संख्या दुई हजार ९२८ रहेको राष्ट्रिय तथ्याङ्क कार्यालयले जनाएको छ।
यो देशको जनसंख्याको ०.००१ प्रतिशत हो। राष्ट्रिय तथ्याङ्क कार्यालयले गत कात्तिक २५ देखि मंसीर ९ गतेसम्म जनगणना गरेको थियो। तथ्याङ्क कार्यालयले हरेक १० वर्षमा राष्ट्रिय जनगणना गर्दै आएको छ।
जनगणनामा देशभर अक्सर बसोबास गर्ने सम्पूर्ण व्यक्तिको निश्चित समय अवधिभित्र गणना गरी व्यक्तिगत तथा पारिवारिक विवरणसँग सम्बन्धित तथ्याङ्क सङ्कलन गरिएको थियो ।
तथ्यांकले समग्र मुलुक, जिल्ला, पालिका र वडाका बिकास, ऐन, निती निर्माणमा सहयोग पुरयाउछ । कार्यक्रमको सहजीकरण भने तथ्यांक अधिकृत राजेन्द्रप्रसाद पराजुलीले गर्नुभएको थियो ।