स्याङजा २८ साउन । ज्याग्दी नहरमा गएको पहिरो झण्डै एक महिना लगाएर हटाएपछि पानी सञ्चालनमा आएको छ ।
गत असार २२ गते आएको अविरल वर्षसँगैको पहिरोले अवरुद्ध हुँदा नहर सञ्चालनमा आउने सकेको थिएन् । अविरल वर्षासँगै आएको पहिराले नहरको छ किमि तीन सय मिटरको दुरीमा रहेको भुङ्दी र चार किलोमिटर नौ सय ५० मिटरको दुरीमा रहेको डाङग्रेपानी भन्ने ठाउँमा ठूला ढुङ्गासहितको पहिराले नहर अवरुद्ध भएको थियो । नहर सञ्चालनमा नआउँदा चापाकोटको ५०० हेक्टर जमिनमा रोपाईँ हुन सकेको थिएन् । नहर सञ्चालनमा आएसँगै कृषकहरु धन रोप्न व्यस्त भएका छन् ।
चापाकोट नगरपालिका ४ दार्सिङस्थित ज्याग्दीखोलामा बाँध बाँधेर २७ किलोमिटर लामो नहरबाट यहाँको एक हजार हेक्टर जमिन सिचाई गरिदै आएको छ । जसमध्ये पाँच सय हेक्टर जमिन सिचाईको लागि नहरको विकल्प छैन् । गत असार २२ गते माथिल्लो भागबाट आएको ठूलो ढुङ्गासहितको पहिरोले पुरिएको नहरका पहिराहरु हटाउने काम सम्पन्न भएकोे चापाकोट टार सिँचाइ योजना जल उपभोक्ता समितिका अध्यक्ष कृष्णसुवेदीले बताउनुभयो ।
पहिरो सहितको ढुङ्गा पन्छाएर बुधबार रातिबाट नहरमा पानी सञ्चालन गरपछि धान रोप्न सुरु भएको छ । चापाकोट नगरपालिकाका प्रमुख देवबहादुर खाणले नहर सञ्चालन गर्नको लागि नगरपालिका सहित स्थानीयको सहयोगमा ढुङ्गा फुटाउने र पहिरो फाल्ने काम सम्पन्न भएसँगै नहर सञ्चालनमा आएको हो ।