काठमाडौं ०७ असोज । मदन पुरस्कार गुठीले वर्ष २०७७ को जगदम्बा-श्रीबाट नृत्यशास्त्री भैरवबहादुर थापा र मदन पुरस्कारबाट ‘लिम्बूवानको ऐतिहासिक दस्तावेज सङ्ग्रह’का लेखक भगिराज इङ्नाम सम्मानित गर्नेभएकाे छ ।
गुठीकाे बिहीबार बसेकाे साधारण सभाले थापा र इङ्नामलाई सम्मानित गर्ने निर्णय गरेकाे हाे ।
‘मदन पुरस्कार- २०७७’ को लागि गुठीमा प्राप्त २२२ पुस्तकहरु मध्येबाट ९ वटा पुस्तकहरु छनाेट भएका थिए । सूचीमा प्रभा बरालको फिलिङ्गो, लेखनाथ क्षेत्रीको फुलाङ्गे, केशव दाहालको मोक्षभूमि, जेशन कुँवरको रमिते र भगिराज इङ्नामको लिम्बुवानको ऐतिहासिक दस्ताबेज संग्रह १७१९-२०२० छन् ।
यसैगरी सूचिमा गिरी श्रीस मगरको एकलब्यको देब्रे हात, कृष्ण अविरलको करिया, कुमार नगरकोटीको कल्प ग्रन्थ, वैरवबहादुर थापाको नृत्याक्षर विज्ञान रहेका छन् ।
गुठीका अनुसार २०७७ सालको पुरस्कारका लागि २२२ वटा पुस्तक प्राप्त भएकामा ती मध्येबाट बढीमा १० पुस्तकहरूको श्रेष्ठ सूची तयार गर्न समिति गठन गरिएको थियो । समितिले गुठीलाई ९ पुस्तकको नाम उपलब्ध गराएको हो ।
अप्रकाशित सामग्रीहरूको बाहुल्य रहेका पुस्तकलाई छनौटको एउटा आधार बनाइएको गुठीले जनाएकाे छ । छनौटमा परेका ती पुस्तकहरू मध्ये एक पुस्तकलाई सर्वश्रेष्ठ पुस्तकका रूपमा वर्ष २०७७ को मदन पुरस्कार अर्पण गरिएकाे हाे ।
