स्याङ्जा ५ जेठ । चापाकोट जनप्रतिनिधि सहितको समूहले प्रधानमन्त्री पुष्पकमल दाहाल ‘प्रचण्ड’ लाई चापाकोटमा कृषि क्याम्पस स्थापना गर्ने विषयमा भेटघाट गरेका छन् । समूहले चापाकोटमा क्याम्पस स्थापनाका लागि ढिलाई भएको भन्दै ध्यानाकर्षण गराएका छन् ।
कानुन, न्याय तथा संसदीय मामिला मन्त्री एवं स्याङ्जा क्षेत्र २ का प्रतिनिधिसभा सदस्य धनराज गुरुङको नेतृत्वमा गण्डकी प्रदेशसभाका पूर्वसांसद भागवत प्रकाश मल्ल, चापाकोट नगरप्रमुख देवबहादुर खाँण (इश्वर) लगायतको समूहले प्रधानमन्त्री प्रचण्डलाई भेट गरी कृषि क्याम्पस स्थापना गरी सञ्चालन गर्ने विषयमा ध्यानकर्षण गराउदै छिटै प्रक्रिया सुरु गर्नेगरी वातावरण निर्माण गर्न अनुरोध गर्नुभएको थियो ।
प्रधानमन्त्रीसँगको भेटघाट कुराकानी गर्दै कानुन मन्त्री गुरुङले कृषि क्याम्पस संचालन गर्ने विषयमा प्रधानमन्त्री सकारात्मक रहेको जानकारी दिनुभयो । उहाँले आवश्यक सहयोग गर्ने र सम्बन्धित पक्षसँग कुरा गर्ने बताउनुभएको छ । गण्डकी प्रदेश सभाका पूर्वसांसद भागवतप्रकाश मल्लले आफूहरुले अर्थमन्त्रीसँग र प्रधानमन्त्रीसँग भेटघाट गरेको हुँदा अब कृषि क्याम्पसको काम अगाडि बढ्नेमा आशावादी भएको बताउनुभयो ।
चापाकोट नगरपालिकाका नगर प्रमुख देव बहादुर खाँणले आफूहरु चापाकोटमा कृषि क्याम्पस स्थापना गर्ने विषयमा नियमित रुपमा लगिरहेको बताउनुभयो । प्रधानमन्त्री र अर्थमन्त्रीसँगको भेटपछि सबै कुराहरु सकारात्मक आएका छन् ।
क्याम्पस स्थापना गर्न मात्रै नभएर समग्र चापाकोटको विकासका लागि सबैजना एकजुट भएर लाग्नुको विकल्प छैन । स्याङ्जाको चापाकोटमा कृषि क्याम्पस स्थापना गर्नको लागि चाहिने न्यूनतम जग्गा (१०८ रोपनी) मध्ये करिव १ सय १० रोपनी जग्गा विश्वविद्यालयको नाममा पास भइसकेको र ९० रोपनी जग्गा पास गर्ने चरणमा रहेको छ ।