स्याङ्जा १५ पुस । गुरुङ समुदायले शुक्रबार ‘तमु ल्होसार’ पर्व मनाउँदैछन् । हरेक १५ पुसमा गुरुङ समुदायले तमु ल्होसार पर्व मनाउने गर्छन् । यो ल्होसारलाई तोला ल्होसार पनि भनिन्छ ।
तमु भन्नाले गुरुङ समुदायलाई चिनाउँछ भने ल्होसार भन्नाले नयाँ वर्ष भन्ने अर्थ लाग्दछ । तमु ल्होसारलाई गुरुङ समुदायले नयाँ वर्षका रुपमा मनाउने गर्छन् । यो पर्व गुरुङ समुदायले ’तो ल्हो’ बाघ वर्गको बिदाइ गर्दै ’हि ल्हो’ बिरालो वर्गको स्वागत गरेर भव्य रूपमा मनाउने गर्दछन् ।
यस दिन गुरुङ समुदायले हर्षोल्लासका साथ आफ्नो भेषभुषा र नयाँ परिकार ग्रहण गरी नयाँ वर्षलाई स्वागत गर्दछन् । ‘तमु ल्होसार’ पर्व सूर्यको किरणसँग सम्बन्धित छ । गुरुङ समुदायको बाहुल्य रहेको नेपालको धेरै जिल्लाहरुमा सूर्यको ताप पहिले आउने भएकाले पुस १५ मा यो पर्व मनाउने गरिएको हो ।
गुरुङ जातिको १२ वटा बर्ग चक्र हुन्छन् । गुरुङ जातिले हरेक वर्षको पुस १५ गते नयाँ वर्षको रुपमा ल्होसार मनाउँछन् । कला संस्कृति झल्कने पहिरनमा सजिदै सामुहिकरुपमा रमाइलो र खानपान गर्दै मनाउने गर्छन । यस अवसरमा उनिहरु खुसीसाथ सामूहिक भोज, सांस्कृतिक कार्यक्रम एवं नाचगान गरेर मनाउने गर्दछन् । सरकारले हरेक बर्ष ल्होसारको अवसरमा सार्बजनिक विदा समेत दिदै आएको छ ।
यसैगरी, व्राहमण जातीले पनि आजको दिनलाई पुसे पन्ध्रमका भनेर मनाउने गर्दछन । आजका दिन आफना अग्रजबाट टिका र आशिरवाद लिदै बिशेषगरी अनदीको चामलबाट बनाइएको लट्टे, सेल लगायतका बिभिन्न परिकार खाने खुवाउने प्रचलन छ । यस्तो खानाले जाडोको समयमा शरिर तताउने र स्वस्थ्य रहने भनाई छ ।
