स्याङजा २४ साउन । स्वर्गिय पतिको पुष्पमान श्रेष्ठको ९३ औं जन्मदिन पारेर चन्द्रलक्ष्मी श्रेष्ठले पुष्पचन्द्र अक्षयकोष स्थापना गर्नुभएको छ ।
पुतलीबजार नगरपालिका ३ बाडखोला निवासी चन्द्रलक्ष्मी श्रेष्ठले आफना पति पुष्पमान श्रेष्ठको जन्मदिन पारेर १ लाख ५१ हजार रुपैंयाको अक्षयकोष स्थापना गर्नुभएको हो ।
उहाले सोही वडामा रहेको काजिमान हरिटीका माध्यमिक बिद्यालयमा अक्षयकोष स्थापनासंगै चेक हस्तान्तरण गर्नुभएको छ ।
सो बिद्यालयमा अध्ययनरत गरिब तथा विपन्न परिवारका बिद्यार्थीलाई शिक्षा आर्जनमा सहयोग पुरयाउने उदेश्यले उक्त अक्षयकोष स्थापना गरेको श्रेष्ठले जनाउनुभयो ।
अक्षयकोषबाट आर्जित बार्षिक ब्याजबाट बिद्यालयमा अध्ययरत जेहेन्दार तथा गरिब बिद्यार्थी छनौटगरी प्रदान गरिनेछ । अक्षयकोषको रकम बिद्यालय ब्यवस्थापन समितिका अध्यक्ष महेन्द्रमान ब्यथितलाई सिमित ब्यक्तिबीच औपचारिक कार्यक्रम आयोजनागरी हस्तान्तरण गरिएको छ ।
अक्षयकोषको रकम ग्रहण गर्दे महेन्द्रमान ब्यथितले समाजसेवी पुष्षमानको समाजसेवा र योगदानका बारेमा चर्चा गर्नुभएको थियो । उहाँले समाजसेवी श्रेष्ठ बारे कृति प्रकाशनका लागि परिवारलाई सुझाव दिनुभयो ।
कार्यक्रममा वडाअध्यक्ष अमृतप्रसाद श्रेष्ठ, प्रधानाध्यापक ओमप्रकाश शर्मा, सूर्यौदय सहकारीका कोषाध्यक्ष दिर्घनारायण शर्मा लगायतले अक्षयकोषदाता लगायत परिवारप्रति आभार ब्यक्त गर्दै शिक्षाक्षेत्रमा गरिएको पुनित कार्यको प्रशंसा गर्नुभयो ।
अक्षयकोषका संरक्षक चन्द्रलक्ष्मी श्रेष्ठको अध्यक्षतामा सम्पन्न कार्यक्रमको संचालन अर्जुन उपाध्यायले गर्नुभएको थियो ।
आफुहरुले अध्ययन गरेको बिद्यालयमा आमाको चाहना बमोजिम अक्षयकोष स्थापना गरेको र आउने दिनमा अक्षयकोषको रकम बृद्धि गर्दे लैजाने छोरा योगेन्द्रमान श्रेष्ठको भनाई छ ।
