स्याङ्जा १८ माघ । आँधीखोला गाउँपालिका १ सिरुबारी अन्र्तगत २ किलोमीटर वरपरको क्षेत्रमा गएराती एकै रातमा १२ ठाउँमा चोरी भएको छ।
चोरी हुनेमा ९ वटा निजी घर, एउटा सहकारी संस्था, बौद्ध गुम्बा र वडा कार्यालय, रहेका छन्। लुटेराले नगद, गुम्बामा राखिएको दानपेटिका, सुन सहित सुकुटी समेत चोरेका छन्।
राजाश्वारादेखि सिरुवारीसम्मको करिब २ किलोमीटर वरपरको क्षेत्रमा चोरी गर्दा साढे १० तोला सुन, ३ लाख ३६ हजार नगद, गुम्बाको दानपेटिका र २ किलो (भैंसीं) को सुकुटी समेत चोरेर लगेको प्रहरी निरीक्षक पदमराज थापाले जानकारी दिनुभयो ।
प्रहरीका अनुसार, सबैभन्दा बढी पूर्णबहादुर गुरुङको घरबाट मङ्गलसूत्र, चन्द्रमा, नौगेडी, चुरा, बेरुवा औँठी गरी साढे १० तोला सुन र नगद दुई लाख पाँच हजार चोरी भएको छ।
गंगाधर ढकालको पसलबाट ६० हजार, लक्ष्मी फेन्सिबाट ७ हजार, मेखबहादुर दर्जीको पसलबाट २० हजार, कृष्णप्रसाद पौडेलको पसलबाट ७ हजार, पूर्णप्रसाद बगालेको पसिलबाट सीसीटिभी मनिटर, सीपीयू एक÷एक वटा, मित्रलाल अधिकारीको पसलबाट नगद १ हजार, भेषकुमारी दर्जीको पसलबाट ५ हजार रहेको छ।
यसैगरी, वडा कार्यालय अन्र्तगत वडाअध्यक्षको कार्यकक्षबाट राजश्व संकलन गरिएको ३० हजार, दिगो बहुउदेश्यीय सहकारी संस्थाबाट १ हजार, सिरुवारी गुम्बाको दान पेटिकाको भने विवरण खुल्न सकेको छैंन। ख्यामबहादुर दर्जीको घरबाट दुई केजी सुकुटी चोरीएको छ।
कुनै समूहको संलग्नता रहेको र नजिक भएका ब्यक्तिबाटै चोरी भएको हुनसक्ने प्रहरी अनुमान छ। प्रहरी अनुसन्धान सुरु भैसकेको प्रहरीले जनाएको छ।