काठमाण्डौं २६ भदौ । वासिङटनः सन् २००१ सेप्टेम्बर ११ मंगलबारको दिन भएको ट्वीन टावर हमलाको २० बर्ष पुरा भएको छ । सोही दिनको स्मरण गर्दे अमेरिकाले २० औं स्मृति दिवस मनाइरहेको छ ।
ट्वीन टावर हमलामा मारिएका मानिसको सम्झनामा अमेरिकाले शनिबार २० औं स्मृति दिवस मनाइरहेको हो । न्युयोर्कस्थित दुई गगनचुम्बी भवन वल्र्ड ट्रेड सेन्टरमा आतंककारीहरुले चार विमान ठोकेर हमला गरेका थिए ।
स्थानीय समय अनुसार मंगलबार बिहान ८ बजेर ४६ मिनेटमा पहिलो टावरमा बिस्फोट गराइएको थियो । १६ मिनेटपछि दोस्रो टावरमा ठोक्काइएको थियो बिस्फोटपछि टावरमा दुई घन्टासम्म आागो लागेको थियो । एक सय दश तले दुवै भवन ढलेर खरानी भएका थिए ।
नौ बजेर ३७ मिनेटमा तेस्रो विमानलाई अमेरिकी रक्षा मन्त्रालय रहेको भवन पेन्टागनमा जोतिएको थियो भने वासिंगटनतर्फ बढिरहेको अर्को विमान पेन्सालभेनियाको आकाशमा बिस्फोट भएको थियो । अपहरणकारी र यात्रुबीच विमानभित्र भनाभन हुँदा विमान आकाशमै बिस्फोट भएको थियो ।
उक्त हमलामा परी न्युयोर्कको पेनसिल्भानिया र भर्जिनियाका गरी १९ आक्रमणकारी सहित करिब ३ हजार मानिसको मृत्यु भएको थियो । हजारौँ मानिस घाइते भएका थिए । हमला हुँदा भवनभित्र करिब १७ हजार मानिस रहेको बताइएको थियो । आक्रमणमा अर्बौ डलर क्षति भएको थियो ।
हमलापछि अमेरिकाले कट्टरपन्थी सशस्त्र समूह आतंकवादविरुद्ध युद्ध नै गरेको थियो । अमेरिकाले आतंकवाद अन्त्य गर्ने भन्दै अफगानिस्तानमा सैन्य बल नै स्थापना गरेको हो । सेप्टेम्बर ११ को उक्त हमलालाई संसारकै अविष्मरणीय एवम् दर्दनाक घटनाको रुपमा लिइन्छ ।
ओसामा बिन लादेनको नेतृत्वको अतिवादी सञ्जाल अलकायदाले सो हमला गरेको थियो । आक्रमणमा संलग्न अन्य १५ जना साउद अरबका थिए भने दुई जना यूएई, एक जना इजिप्सेली र अर्का लेबनानका थिए ।
हमलाको तीन सातापछि अमेरिकाले अफगानिस्तानमा आक्रमण सुरु गरेको थियो । बिन लादेनलाई पत्ता लगाउन र अल–कायदाको सञ्जाल ध्वस्त पार्न भन्दै तत्कालीन राष्ट्रपति जर्ज डब्ल्यू बुस प्रशासननले अफगानिस्तानमा आक्रमण सुरु गरेका थियो । आक्रमणकारीलाई अफगानिस्तानले संरक्षण गरेको अमेरिकी आरोप थियो । अमेरिकी आक्रमणपछि तालिवान सत्ताच्युत भएको थियो ।
अमेरिकी नेतृत्वको सो हमलामा अन्तर्राष्ट्रिय गठबन्धन सेनाले सहयोग गरेको थियो । सन् २०११ मा पाकिस्तानमा अमेरिकी सेनाले लादेनलाई मारिदिएको थियो ।
अतिवादीबिरुद्ध को दुई दशक लामो आक्रमणमा अमेरिका रित्तो हात लिएर यही ३१ अगस्टमा स्वदेश फर्किएको छ । अमेरिकी सेना स्वदेश फर्किन नपाउदै तालिवानले अफगानिस्तान कब्जा गरेको थियो । अहिले तालिवानले अन्तरिम सरकार घोषणा गरिसकेको छ ।
२० वर्षको लडाइँमा तालिवानसहित अलकायदा आइएस जस्ता अतिवादी समूहका केही नेतालाई निशाना बनाउन सफल भए पनि अमेरिकाले खासै उपलब्धी पाउन सकेन । युद्वमा २४ सय अमेरिकी सेनाको मृत्यु भएको छ । त्यस्तै युद्धमा ६९ हजार अफगानीको मृत्यु भइसकेको छ ।