स्याङ्जा ३१ बैशाख । लायन्स क्लव अफ स्याङ्जा टाउनको आयोजनामा ५ दिने बृहत योग शिविर सम्पन्न भएको छ । पुतलीबजार नगरपालिका र मुक्तिनाथ विकास बैंकको सहयोगमा बृहत निशुल्क योग बिज्ञान शिविर गरिएको हो ।
शिविरको समापन कार्यक्रममा बोल्दै प्रमुख जिल्ला अधिकारी इश्वरीप्रसाद अर्यालले योग साधनाले मानसिक, शारिरीक स्वस्थयता कायम रहने जनाउदै निरन्तर योगसाधनामा जुटिरहन सुझाव दिनुभयो । योगगुरु बालकृष्ण आचार्यको गृहजिल्ला समेत रहेकाले पनि स्याङ्जा योगमय बन्दै गएको बताउनुभयो । पतञ्जलीद्धारा संचालित योग र साधनाले फाइदा पुग्ने जनाउदै यहाँ सिकाइएका योग साधनामा जुट्न आग्रह गर्दै अनुकुल समयमा आफु पनि सहभागी बन्ने बताउनुभयो ।
कार्यक्रममा पतन्जली योगपीठ स्याङ्जाका अध्यक्ष नारायण अधिकारी, उद्योग वाणिज्य संघ गण्डकी प्रदेश कोषाध्यक्ष नवराज सुवेदी लगायतले शुभकामना मन्तब्य सहित शिविरको आवश्यकता एवं महत्वका बारेमा बोल्नु भएको थियो ।
लायन्स क्लव अफ स्याङ्जा टाउनका अध्यक्ष सुनिता पौडेलको अध्यक्षतामा सम्पन्न कार्यक्रमको संचालन सहसचिव देवी पौडेलले गर्नुभएको थियो ।
पतञ्जली योग पिठ नेपाल महिला पतन्जली योग समिति नेपालको सहयोगमा पुतलीबजारमा भएको सो शिविरमा साधवी एवं योग प्रशिक्षक देवकृपाले प्रशिक्षण दिनुभएको थियो । शिविरमा पोखरा, वालिङ, भीरकोट केन्द्रका योग प्रशिक्षकले सहजीकरण गर्नुभएको थियो ।
बैशाख २७ देखि सुरु गरिएको योग शिविर बिहान ५ बजेदेखि ७ बजेसम्म संचालन हुदै आएको थियो । शिविरबाट सयौं ब्यक्तिले योग र साधना सम्बन्धी लाभ लिने अवसर पाउनुभएको छ ।
