स्याङ्जा १३ मंसिर । वालिङ नगरपालिकाले पालिका गान बनाउने भएको छ । नगरपालिकाले बुधबार एक सूचना प्रकाशन गर्दै ३० दिनभित्र पालिका गानको रचना पेश गर्न आग्रह गरेको छ ।
पालिकाको गान तयार गर्दा वालिङ नगरपालिका नाम अनिवार्य समावेश हुुनपर्ने, रचनामा वालिङको सामाजिक, सांस्कृतिक, प्राकृतिक, भौगोलिक, धार्मिक ऐतिहासिक तथा पुरातात्विक विशिष्टता झल्कने हुनुपर्ने भनिएको छ ।
रचना बढीमा ५० शब्द भएको मौलिक विशिष्टता झल्कने सहज तथा सरल नेपाली भाषामा हुनुपर्ने, रचनामा प्रयोग भएका शब्दको संक्षिप्त व्याख्या गरिएको हुनुपर्ने सूचनामा उल्लेख गरिएको छ । साथै रचनामा कुनै जातिय विभेद, सामाजिक सदभाव, सार्वभौमिता, राष्ट्रिय एकता वा अखण्डतामा आँच आउने शंकेत वा शब्द प्रयोग गर्ने पाईने छैन् ।
पालिका गान छनोट सर्वाधिकार विषय विज्ञहरु समेत रहेको समितिमा रहनेछ भने छनोट भएको रचना विषय विज्ञहरुको समितिले आवश्यक परिमार्जन गर्नेछ । पालिका ज्ञान समितिले छनोट गरेको रचना पालिका गानको रुपमा स्विकृति सम्बन्धी अन्तिम अधिकार नगरपालिकाको रहनेछ । स्वीकृत भएको रचनाको सर्वाधिकार नगरपालिकाको रहनेछ भने रचनाकारले उक्त रचना अन्त प्रयोग गर्न पाउनेछैन् ।
छनोट भएको रचनालाई कदरपत्र र नगदले सम्मान गर्ने नगरपालिकाले जनाएको छ । इच्छुक रचनाकारले आफ्नो रचना खामबन्दी गरी नगरपालिकाको शिक्षा तथा खेलकुद शाखा कार्यालयमा बुझाउन सक्नेछन् भने नगरपालिकाको इमेल walingmun@gmail.com मा समेत पठाउन सक्नेछन् । रचना पठाउँदा रचनाकारले आफ्नो नाम थर, ठेगाना, सम्र्पक नम्बर स्पष्ट संग लेखेर पठाउनुपर्ने नगरपालिकाले जनाएको छ।