स्याङ्जा १० चैत । वालिङ नगरपालिका – ६ माझकोटमा भ्यान दुर्घटना हुँदा एक जना महिलाको घटनास्थलमै मृत्यु भएको छ भने चालक घाइते भएका छन् ।
मृत्यु हुनेमा वालिङ् ७ बस्ने ४८ वर्षीया दिलसरा आले रहेको प्रहरीले जनाएको छ। भ्यानमा सवार आले दुर्घटनास्थलमा नै मृत भेटिएको प्रहरी निरीक्षक प्रवेश तिवारीले जानकारी दिनुभयो ।
दुर्घटनापछि फरार चालक २८ वर्षीय सुरज थापा घाइते अवस्थामा भेटिएपछि प्राथमिक स्वास्थ्य केन्द्र वालिङ्मा सामान्य उपचारपछि थप उपचारका लागि पोखरा रिफर गरिएको छ ।
वालिङ् – चापाकोट भित्री सडकखण्डमा आइतबार ग १ ज ७५११ नम्बरको विङ्गर भ्यान सडकबाट करिब १ सय ५० मिटर तल खसेको र दुर्घटनाको बारे अनुसन्धान भैरहेको प्रहरीले जनाएको छ ।