स्याङजा, ११ चैत । वालिङ बैंकर्स क्लबले बालबालिका , किशोर किशोरी र युवाहरुलाई वित्तीय साक्षरता प्रदान गर्न प्रभातफेरी कार्यक्रमको आयोजना गरेको छ ।
प्रभातफेरिपछिको कार्यक्रममा बोल्दै वालिङ नगर उपप्रमुख कविता तिवारीले नगरभित्रका किसानलाई विना धितो कृषि कर्जा प्रवाह गर्न स्थानीय सरकार जमानत बस्ने बताउनुभयो । बैंकर्स साथीहरुले कर्जा प्रवाह गरेर सहयोग गर्न आग्रह गर्दै कृषि क्षेत्रको लगानी विना अर्थतन्त्र मजबुत नहुने उहाको भनाई छ । युवा पुस्तालाई स्वदेशमै लगानी गर्ने वातावरण सिर्जना गर्न स्थानीय सरकार र बैंक वित्तीय संस्थाले हातेमालो गर्न आवश्यक रहेको उपप्रमुख तिवारीले भन्नुभयो ।
नेपाल राष्ट्र बैंकको राष्ट्रिय कार्यक्रम अन्तर्गत चैत्र ४ गते देखि सप्ताहव्यापी ग्लोबल मनी विक कार्यक्रम संचालन गरेर आइतवार समापन गरिएको वालिङ बैंकर्स क्लबले जनाएको छ । एक हप्तादेखि वालिङका रहेका बैँक तथा वित्तिय संस्थाले विभिन्न विद्यालयमा सचेतनामूलक कार्यक्रम आयोजना गरेको वालिङ बैंकर्स क्लबका अध्यक्ष प्रेमकिशोर अर्यालले बताउनुभयो ।
मोबाईल बैंकिङको दुरुपयोग र समाजमा आर्थिक स्थिरता बढेको भन्दै वालिङ बजारमा प्रभातफेरी आयोजना गरिएको अध्यक्ष अर्यालको भनाई छ । सानै उमेरदेखि बचत गर्ने बानीको विकास गर्न एक हप्तादेखि विद्यालय लक्षित कार्यक्रम पुराभएसंगै समापनका क्रममा प्रभातफेरी गरेर ग्लोबल मनी विक मनाइएको उहाले जानकारी दिनुभयो ।
वालिङ नगरभित्र क, ख र ग बर्गका २० वटा बैंक तथा वित्तीय संस्थाहरुले कारोबार गर्दै आएका छन् । वालिङका वित्तीय संस्थाहरुले १२ अर्व निक्षेप र १० अर्ब कर्जा प्रवाह गर्ने गरी कारोबार गर्दै आएका छन् । पछिल्लो समय लगानी गर्दा उच्च जोखिम हुने त्रासले कर्जा भन्दा निक्षेप बढ्न थालेको छ ।