स्याङ्जा २ कात्तिक । भीरकोट नगरपालिका –१ सिसौघारी खेलमैदानमा संचालित बयँरघारी मेलामा भएको पुरुष भलिबल प्रतियोगितालो उपाधि पुतलीबजार नगरपालिकाले जितेको छ ।
बयरघारी पिस युथ क्लबद्धारा आयोजित चौथो बयरघारी रमाइलो मेला अन्र्तगत रहेको प्रतियोगिताको फाइनलमा पुतलीबजारले भीरकोट नगरपालिकालाई ३–२ को सेटमा पराजित गर्दै उपाधि जितेको हो ।
मेलाको अन्तिम दिन आइतबार सम्पन्न फाइनल खेलमा पुतलीबजारले पहिलो सेट २५–२०, दोस्रो सेट २१–२५, तेस्रो सेट २५–२०, चौथो सेट २४–२६ र अन्तिम पाँचौं सेट १५–१२ ले जित्दै उपाधि जित्यो ।
पुतलीबजार नगरपालिकाले एक लाख १५ हजार सहित ट्रफी, मेडल र प्रमाणपत्रले पुरस्कृत भएको छ । उपविजेता भीरकोटले ७० हजार सहित ट्रफी, मेडल र प्रमाणपत्रमा पाएको छ ।
तेस्रो स्थानमा पाएको वालिङ् नगरपालिकाले ४० हजार र सान्त्वना भएको बिरुवाले ३० हजार सहित ट्रफी, मेडल र प्रमाणपत्र पाएका छन् । सबैलाई भीरकोट नगरप्रमुख गोविन्दकुमार कर्माचार्यले पुरस्कार प्रदान गर्नुभएको थियो ।
प्रतियोगितामा पुतलीबजारका दर्शन गुरुङ सर्वोत्कृष्ट, लेशन गुरुङ उत्कृष्ट ब्लकर, विवश खड्का उत्कृष्ट सेटर र सन्तोष राना उत्कृष्ट प्रशिक्षक घोषित भए ।
भीरकोटका सुशील खड्का उत्कृष्ट स्पाइकर, जीतबहादुर सार्की उत्कृष्ट लिब्रो, वालिङ्का ठगबहादुर गुरुङ उत्कृष्ट सर्वर र बिरुवाका लभसन सुनार उदयमान खेलाडी घोषित भएका भई सबैलाई ट्रफी, मेडल र प्रमाणपत्र प्रदान गरिएको क्लबका अध्यक्ष रोशन गुरुङले जानकारी दिनुभयो ।
चार–चार पालिकालाई दुई समूहमा विभाजन गरी लिग प्रणालीमा सञ्चालन गरिएको प्रतियोगितामा अर्जुनचौपारी, बिरुवा, पुतलीबजार, भीरकोट, वालिङ र तनहुँको शुक्लागण्डकी नगरपालिकाका भलिवल खेलाडी सहभागि थिए । रमाइलो मेला असोज २३ देखि सुरु भएको थियो भने कात्तिक २ गते समापन गरिएको थियो ।