स्याङ्जा १७ मंसिर । पुतलीबजार नगरपालिका –७ ठुलाडिहीमा भएको भरुवा बन्दुक प्रकरणका फरार प्रतिवादी ६९ वर्षीय हुमबहादुर शाही पुनः पक्राउ परेका छन्।
ज्यान मार्ने उद्योगसम्बन्धी मुद्दामा धरौटीमा छुटेका उनी उच्च अदालत पोखराको पछिल्लो आदेशपछि पुनः पक्राउ परेका हुन्।
साउन ६ गते बारीमा सुन्तलाको बिरुवा रोप्दै गर्दा ४४ वर्षीय सुरेन्द्र रेग्मी भरुवा बन्दुकका छर्रा लागेर घाइते भएपछि घटनाको अनुसन्धान अघि बढेको थियो।
अनुसन्धानका क्रममा स्थानीय शाहीको संलग्नता रहेको भन्दै प्रहरीले साउन ८ गते राति उनलाइ तनहुँबाट पक्राउ परेका थिए। शाहीले पुतलीबजार –७ मा लुकाई राखेको एक नाले भरुवा बन्दुक समेत भेटिएको थियो।
शाहीलाई स्याङ्जा जिल्ला अदालतले भदौ ३ गते धरौटीमा छाडेको थियो। उच्च अदालत पोखराले थप प्रक्रिया अघि बढाउन निर्देशन दिएपछि स्याङ्जाबाट खटिएको प्रहरी टोलीले मंसिर १४ गते शाहीलाई पुनः पक्राउ गरेको प्रहरी नायब उपरीक्षक प्रसन्न राज चौधरीले जानकारी दिनुभयो ।
स्याङ्जा अदालतले शाहीलाई ज्यान मार्ने उद्योग मुद्दामा पुर्पक्षका लागि जिल्ला कारागार स्याङ्जा चलान गर्ने आदेश दिएको छ।