स्याङ्जा २५ जेठ । जिम्मेवार चालक म, जिम्मेवार यात्रु म, सुरक्षित सडक र सवारी, हामी सबैको जिम्मेवारी भन्ने नाराका साथ यात्रु स्याङ्जामा ट्राफिक सप्ताह सुरु भएको छ ।
बाजागाजा सहितको प्रभातफेरी सहित स्याङ्जामा ट्राफिक सप्ताह हिजोदेखि सुरु भएको हो । ज्येष्ठ ३१ गतेसम्म चल्ने सप्ताहको शुभारम्भ गर्नुहुदै पुतलीबजार नगरपालिकाका नगर प्रमुख तुलसीराम रेग्मीले सानो गल्ती र लापरबाहिले ठुलो जोखिम र क्षति निम्त्याउने भन्दै ट्राफिक नियमको पुर्ण पालना गर्नुपर्ने कुरामा जोड दिनुभयो । उहाँले ट्राफिक नियमको पालना गरेर सभ्य नागरिकको परिचय दिन सबैलाई आग्रह समेत गर्नुभयो ।
कार्यक्रममा आँधिखोला गाउँपालिकाका अध्यक्ष विश्वनाथ पौडेल, निमित्त प्रमुख जिल्ला अधिकारी दीपक पौडेल, नागरिक समाज स्याङ्जाका अध्यक्ष ओमप्रकाश शर्मा, स्याङ्जा गण्डकी यातायात प्रा लि का प्रबन्ध निर्देशक महेश थापा गणेश लगायतले शुभकामना मन्तव्य राख्नुभएको थियो ।
स्याङ्जा प्रहरी प्रमुख प्रहरी उपरिक्षक दधिराम न्यौपानेको अध्यक्षतामा सम्पन्न कार्यक्रममा प्रहरी नायब निरीक्षक भुपेन्द्र प्रसाद गौलीले स्वागत एवम् कार्यक्रमको सञ्चालन प्रहरी सहायक निरीक्षक सुजन अधिकारीले गर्नुभएको थियो ।
प्रगतीनगर, घुम्ती, शहिदचोक, ट्राफिक चोक हुदै सिटी हल सम्म बाजागाजा सहित र्याली गरिएको थियो भने सिटीहलमा आएर सो र्याली कार्यक्रममा परिणत भएको थियो । सप्ताह अवधिभर ट्राफिक सचेतना सम्बन्धीका विविध कार्यक्रम, रक्तदान लगायतका कार्यक्रम तय भएका छन् ।
