स्याङ्जा २१ असोज । नागरिकलाई सुविधा सम्पन्न भवनबाट समयानुकूल स्वास्थ्य सेवा दिने लक्ष्य अनुसार निर्माण गर्न लागिएको स्याङ्जा र पर्वतका चार स्वास्थ्य संस्था ३ वर्षदेखि अलपत्र अवस्थामा रहेका छन् ।
स्याङ्जाका ३ र पर्वतको १ गरी एकै पटक ठेक्का आव्हानबाट निर्माण प्रक्रिया थालिएका स्वास्थ्य संस्थाको भवन ३ वर्षदेखि अलपत्र अवस्थामा पुगेका हुन् । वि.सं. २०७७ सालमा ठेक्का आह्वान भएर २०७९ सालमा भवन निर्माण सम्पन्न हुनुपर्ने थियो । तर, निर्माण कम्पनीको लापरबाहीले ४ स्वास्थ्य संस्थाका भवन निर्माणकै क्रममा अलपत्र अवस्थामा पुगेका हुन् ।
स्याङ्जाको वालिङ नगरपालिका–१ धनुबाँसेस्थित एवादी आयुर्वेद औषधालय, अर्जुनचौपारी गाउँपालिका–५ आरुचौर आयुर्वेद औषधालय र सेतीदोभान प्राथमिक स्वास्थ्य केन्द्र र पर्वतको बराचौर प्राथमिक स्वास्थ्य केन्द्रका भवन हाल अलपत्र अवस्थामा रहेका छन् ।
तीनवटा स्वास्थ्य संस्था एउटै निर्माण कम्पनीले सम्झौता गरेको थियो भने एक स्वास्थ्य संस्था भवनको निर्माणका लागि अर्को निर्माण कम्पनीले जिम्मा लिएको थियो । आरुचौर आयुर्वेद औषधालय, सेतीदोभान प्राथमिक स्वास्थ्य केन्द्र र बराचौर प्राथमिक स्वास्थ्य केन्द्र भ्याली÷बाबुरत्न जेभी काठमाडौंले ३ वर्षमा सक्नेगरी सम्झौता गरेको थियो ।
धनुबाँसे खहरे आयुर्वेद औषधालय सेफ इन्जिनियरिङ बिल्डर्स भरतपुर चितवनले ३ वर्षमा सम्पन्न गर्नेगरी सम्झौता गरेको थियो । निर्माण कम्पनी भ्याली÷बाबुरत्न जेभी काठमाडौंले तीनवटा स्वास्थ्य संस्था निर्माण गर्न १२ करोड ७१ लाख १६ हजार ९ सय ३० रुपैयाँ भ्याट बाहेकमा सम्झौता गरेको थियो भने सेफ इन्जिनियरिङ बिल्डर्सले एक करोड ५८ लाख ८६ हजार १५५ रुपैयाँ भ्याट बाहेका सम्झौता गरेको थियो ।
दुई कम्पनीले फागुन २०७७ फागुनमा ३ वर्षमा सक्ने गरी भवन निर्माणको सम्झौता गरेको सहरी विकास तथा भवन कार्यालय कास्कीका इन्जिनियर अच्युत पौडेलले बताए । भ्याली÷बाबुरत्न जेभीले निर्माण गर्ने जिम्मा पाएको ठेक्काको म्याद चार पटकसम्म थपिएको छ ।
अन्तिम पटक २०८२ भदौसम्म सम्पन्न गर्नेगरी म्याद थप गरिएको इन्जिनियर पौडेलले जानकारी दिनुभयो । ‘पटक–पटक ताकेता गर्दा पनि निर्माण कम्पनीले बेवास्ता गरिरहेको छ ।’ पौडेलले भन्नुभयो , ‘अन्तिम पटक थपिएको म्यादमा सकिएपछि जरिवाना तोक्ने तयारीमा छौं ।, अब म्याद थप्ने कुनै आधार नभएको र दुई सय दिनमा काम सम्पन्न नगरेमा कार्यालयले कालोसूचीमा राख्ने तयारी गरेको समेतले पौडेलले जानकारी दिनुभयो ।
अब भवन निर्माण सम्पन्न गरेपनि कम्पनीलाई सम्झौता अनुसारको रकमका आधारमा हरेक दिन शून्य दशमलव ५ प्रतिशतका दरले जरिवाना लगाउने पौडेलले बताउनुभयो । वालिङको धनुवाँसे आयुर्वेद औषधालय निर्माणको शुरुवात देखिनै स्थानीयको बिरोधले केही ढिला हुन गएको कार्यालयले जनाएको छ । कार्यालयका अनुसार हाल पछिल्लो समय विवाद निरुपण भएको छ ।
समयमै भवन निर्माण नहुँदा चार वटै स्वास्थ्य संस्थाले भाडाको घरबाट सेवा प्रवाह गरिरहेका छन् । जसले गर्दा सुविधा सम्पन्न स्वास्थ्य संस्थाबाट पाउनुपर्ने सेवाबाट नागरिक वञ्चित भएका छन् भने भाडा तिर्नुपर्ने अवस्थाले सरकारलाई ठुलो आर्थिक क्षति भएको छ । कार्यालयका अनुसार स्याङ्जाका तीनवटै निर्माणाधीन स्वास्थ्य भवन ४५ प्रतिशतदेखि ७० प्रतिशत काम भएका छन् ।
भ्याली÷बाबुरत्न जेभीका सञ्चालक रमेश अबालेले पेटी (सहायक) ठेकेदारमार्फत काम गराउँदा धोका भएकाले समस्या उत्पन्न भएको सुनाउनुभयो । आउँदो पुस मसान्तभित्र जसरी पनि भवन निर्माण सम्पन्न गर्नेगरी अगाडि बढेको अबालेले जनाउनुभयो । दसैं सकिए लगत्तै दुर्तगतिमा काम सुरु गर्ने र कार्यालयले जरिवाना गरेपनि काम नरोकिने उहाले बताउनुभयो ।
यता, सेफ इन्जिनियरिङ बिल्डर्सका सञ्चालक सूर्य पौडेल भने सम्पर्कमा आएनन् । समयमै काम नगर्ने निर्माण कम्पनीलाई कारबाही गर्ने कानूनी व्यवस्था भए पनि राजनीतिक आडमा छुटकारा पाउँदै आएको जानकारहरुको बुझाई छ । जसले गर्दा अधिकांश विकास निर्माणका कामहरु समयमै नसकिने प्रवृत्ति बढ्दै गएको छ ।