स्याङ्जा १६ भदौ । दैनिक प्रशासनिक काम चुस्त र नागरिकमैत्री बनाउन जिल्ला समन्वय अधिकारी र पालिकाका ११ वटै प्रमुख प्रशासकीय अधिकृतबीच १३ बुँदे प्रतिबद्धतापत्र सहित घोषणापत्र जारी गरिएको छ ।
सोमबार सदरमुकाममा आयोजित कार्यक्रममा समन्वय अधिकारी नबराज बरालले ब्यापक छलफल र परामर्शपछि उक्त प्रतिबद्धता जारी गरेका हुन । पछिल्लो पटक नयाँ अभ्यासका क्रमका बरालले कार्यसूचीमा बार्षिक नीति तथा कार्यक्रमको प्रभावकारी कार्यान्वयन, दैनिक प्रशासकीय कामलाई नागरिकमैत्री बनाउन नियमित रुपमा समन्वय र सहकार्य गर्ने उल्लेख छ ।
जिल्लाका ११ वटै पालिकाका प्रमुख प्रशासकीय अधिकृतले प्रतिबद्धता जनाएको सो कार्यक्रममा आचारसंहिताको पालना, कर्मचारीको क्षमता विकास, त्रैमासिकरुपमा बित्तिय र भौतिक प्रगतिको समीक्षा, बेरुजु न्यूनीकरण, बिभागीय प्रमुखले जारी गरेको निर्देशन पूर्णरुपमा परिपालना, नागरिक गुनासो सम्बोधन, जिल्लासभाबाट पारित भएका योजना कार्यान्वयन, निर्वाचन प्रतिनिधिसंग सुमधुर सम्बन्ध कायम राख्ने, विपद्जन्य घटनाको ब्यवस्थापन शीघ्र कार्यान्वयन, सूचनाको हकलाई उच्च प्राथमिकता दिने र छिटो छरितो सार्वजनिक सेवा प्रवाहका लागि डिजिटल नागरिक बडापत्र, सूचना अधिकारीको नियुक्ति र कार्यसम्पादनलाई थप प्रभावकारी बनाउने रहेको छ ।
पहिलो पटक आयोजित यो कार्यक्रमले सबैको मन जितेको छ । तर, कार्यान्वयन कसरी अघि बढ्छ, हेर्न बाँकी भएको सहभागी एक अधिकृतले भन्नुभयो ।