स्याङ्जा १८ चैत । पत्रकार तथा संचारगृहमाथिको आक्रमणको बिरोधमा स्याङ्जाका पत्रकारहरुले प्रमुख जिल्ला अधिकारी मार्फत सोमबार प्रधानमन्त्री तथा मन्त्रिपरिषद कार्यालयलाई ध्यानाकर्षण पत्र पठाएका छन ।
पत्रकार महासंघ स्याङ्जाका पूर्वअध्यक्ष ओमप्रकाश शर्माको नेतृत्वमा गएको टोलिले सो ध्यानाकर्षणपत्र बुझाएको हो । पत्रमा चैत १५ गते भएको हिंसात्मक प्रर्दशनका क्रममा अराजक समूहले पत्रकार र संचारगृह र संचारकर्मीलाई निसाना बनाएको भन्दै बिभिन्न क्षतिका बारेमा उल्लेख गरिएको छ ।
बिभिन्न ६ बुदे माग समेटिएका सो ध्यानाकर्षणपत्रमा भिडियो खिच्दै गरेका सुरेश रजाकको आगोमा जलेर ज्यान गएको, अन्नपूर्ण पोष्ट दैनिकको कार्यालय भवनमा आगो लगाउनुका साथै ढुंगामुढा प्रहारगरि क्षति पुरयाइएको, कान्तिपुर टेलिभिजनको भवनमा ढुंगामुढागरि क्षति पुरयाइएको, हिमालयन टेलिभिजनको सवार साधन तोडफोड गरिएको, पत्रकार दिनेश गौतममाथि आक्रमणगर्दा खुट्टा भाचिएको, फोटो पत्रकार निराज तामाङ्को क्यामरा हराएको लगायतका बिषय उल्ल्ख छन ।
ती घटनाप्रति पत्रकार महासंघ गम्भीर भएको जनाउदै प्रजिअ मार्फत नेपाल सरकार समक्ष सत्यतथ्य र छानबिन गरि वास्तविकता पत्ता लगाउन समेत माग गरेको छ ।
मृतक पत्रकारका परिवारप्रति न्याय, घाईतेको स्वास्थ्योपचार सहित भौतिक बस्तुको क्षतिपूर्तिका लागि एकसाताभित्र सम्बोधन हुने विश्वसनिय आधार निर्माण गर्न पत्रकार महासंघ स्याङ्जाका अध्यक्ष प्रदीप कोइरालाद्धारा हस्ताक्षरित ध्यानाकर्षणपत्रमा उल्लेख छ।
ध्यानाकर्षणपत्र बुझ्दै दुखद र अप्रिय घटना घटेको जनाउदै मृतकहरुप्रति श्रद्धान्जली र घाईतहरुका शिघ्रस्वास्थ्य लाभको कामना गरिन्। सो घटनालाई गम्भीरतापूर्वक आफुले लिएको र आफुलाई प्राप्त पत्र तत्काल प्रधानमन्त्री तथा मन्त्रिपरिषद कार्यालयमा तत्काल प्रेषित गर्ने प्रमुख जिल्ला अघिकारी सुनिता नेपालले जानकारी दिनुभयो ।
पत्र बुझाउदै घटना र आन्दोलनका बारेमा पूर्वअध्यक्ष ओमप्रकाश शर्माले जानकारी गराउनु भएको थियो भने कार्यक्रमको संचालन सहसचिव रमेश गोदारले गर्नुभएको थियो ।