स्याङ्जा १३ कात्तिक । स्याङ्जा जिल्लाभित्रका सहायक मार्ग (सडक) हरुमा संचालित सवारी साधनहरुको नयाँ भाडादर निर्धारण गरिएको छ । मुख्य सिद्धार्थ राजमार्ग बाहेकका बिभिन्न ४० वटा सहायक मार्गहरुका नयाँ भाडा दर निर्धारण गरिएका छन ।
जिल्ला प्रशासन कार्यालय स्याङ्जामा बसेको सम्बन्धित पक्षहरुको बैठकले सहायक सडकहरुमा चल्ने सवारी साधनमा एकरुपता ल्याउन भाडादर शुल्क तोकिएको हो । जसका कारण अब भाडादर मनलाग्दीरुपले लिन पाइने छैंन ।
स्याङ्जा प्रशासनले सहायक मार्गहरूमा चल्ने जिप, बस, अटो, टेम्पो र ई–रिक्साका लागि भाडादर निर्धारण गरेको प्रमुख जिल्ला अधिकारी ईश्वरीप्रसाद अर्यालले जानकारी दिनुभयो ।
‘पक्की सडकमा बसको भाडा प्रतिव्यक्ति प्रतिकिलोमिटर ५ रुपैयाँ ५० पैसा, र जिपमा ६ रुपैयाँे र कच्ची सडकमा भने बसको ११ र जिपको १२ रुपैंया निर्धारण गरिएको छ ।’ प्रजिअ अर्यालका अनुसार, ‘टेम्पो, अटो र ई–रिक्साका लागि पक्की सडक ३ किलोमिटरसम्म प्रति प्रतिकिलोमिटर प्रतिब्यक्ति ३० रुपैंया तोकेको छ । यदि, ३ किलोमिटरभन्दा बढी दूरी भएमा प्रति किलोमीटर प्रति ब्यक्ति १० रुपैयाँका दरले थप भाडा लिने सकिने व्यवस्था गरिएको छ ।
कच्ची सडकमा भने ३ किलोमिटरसम्म प्रति ब्यक्ति प्रति किलोमीटर ४० रुपैंइा र ३ किलोमीटर भन्दा बढी दुरीमा प्रतिकिलोमिटर प्रतिब्यक्ति १५ रुपैयाँका दरले थप्ने निर्णय गरिएको छ ।’
यातायातका सबै रुटका यातायात व्यवसायीले सो भाडादर स्पष्ट देखिने गरी सवारीसाधन र टिकट काउन्टरमा टाँस्नुपर्ने छ भने ट्राफिक प्रहरीले नियमित अनुगमन गर्ने जनाएको छ ।
हाल कच्ची बाटो पक्की भएर पनि पुरानै दरमा भाडा असुल्ने गुनासो बढेपछि प्रशासनले अब यस्तो कार्य रोक्ने चेतावनी दिएको छ । पक्की सडकमा कच्ची सडक बराबरको भाडा उठाउनेलाई प्रहरीमार्फत कारबाही गरिने प्रशासनले जनाएको छ ।
जेष्ठ नागरिक, विद्यार्थी र अपाङ्गता भएका व्यक्तिलाई भाडामा छुट, सवारी साधनमा सिट सुरक्षित गर्ने गराउने कार्यमा प्रहरी र ट्राफिक कार्यालयले अनुगमन गर्ने भएको छ । र, रातो प्लेटका सवारी साधनले यात्रु ओसारपसार नगर्न नगराउन समेत सूचित गराएको छ ।
यसैगरी, पूर्वाधार विकास कार्यालय, यातायात शाखा स्याङ्जा र स्थानीय पालिकाको समन्वयमा टेम्पो दर्ता शुल्क निर्धारण गर्ने निर्णय गरिएको छ ।
