स्याङ्जा २६ असोज । स्याङ्जाको पत्रकारिता क्षेत्रको बिगत, वर्तमान र भविष्यको सम्भावना एवम चुनौतीका विषयमा अन्तरक्रिया गरिएको छ । खबर कलम, स्मार्ट अखबार अनलाईन र अकला आवाज साप्ताहिक पत्रिकाको आयोजनामा सो अन्तरक्रिया गरिएको हो ।
भीरकोट नगरपालिकामा शनिवार आयोजित कार्यक्रममा बोल्दै भीरकोट नगरप्रमुख गोविन्दकुमार कर्माचार्यले राज्यको चौथौं अंगका रुपमा मानिएको पत्रकारिता जगतले बिश्वसनीय र मर्यादित पत्रकारिता गर्नु पर्ने बताए । नगरपालिकाले गरेका असल कामलाई प्रोत्साहन गर्न र कमीकमजोरी औल्याईदिन पनि प्रमुख कर्माचार्यले सुझाव दिनुभयो ।
सिमित स्रोत र साधनका बाबजूद पनि पछिल्लो पटक घोषणा गरिएको भीरकोटले राम्रा काम गरेको जनाउदै पालिकाले गरेका असल अभ्यासका बारेमा जानकारी गराउजुभयो । कृषिका क्षेत्रमा ठूलो परियोजना कार्यान्वयनको अवस्थामा रहेको जनाउदै नगरबासीले विकास र समृद्धिमा लिएको आशा र चाहना सबै पुरा गर्न कठिनाई भएको बताउनुभयो ।
पालिकाको आन्तरिक आय खासै नभएको उहाको भनाई छ । आँफूहरु सधै पत्रकार र पत्रकारिताको पक्षमा रहेको जनाउदै पालिकाले आवश्यक सहयोग गर्ने बताउनुभयो ।
सोही कार्यक्रममा पत्रकार महासंघका पूर्वअध्यक्ष एवं वरिष्ट पत्रकार ओमप्रकाश शर्मा, निवर्तमान एवं गण्डकी प्रदेश सदस्य श्रीकृष्ण सिग्देल, पूर्वअध्यक्ष एवं गण्डकी प्रदेश पूर्व सदस्य प्रकाश डोटेल, अध्यक्ष प्रदीप कोइराला, अकला आवाजका सम्पादक प्रकाश डुुुुुुुुुुुुुुुुुुुुुुम्रे लगायतले स्याङ्जाको पत्रकारिताको अवस्था, बिगतदेखि हालसम्म एआई पत्रकारिता सम्मको अवस्थाका बारेमा जानकारी गराउदै पत्रकारिताका मूल्य मान्यता, प्रचलित ऐन कानून र आचार संहिता पालना गर्दै प्रकाशन र प्रशारण गर्नुपर्नेमा जोड दिनुभयो ।
अन्र्तक्रियामा जिल्लास्थित क्रियाशिल झण्डै ३ दर्जन पत्रकार सहभागी थिए । सहभागी सबै पत्रकारहरुले आ आफना पेशागत अनुभव, हालका अवस्था, समस्या र चुनौतीका बारेमा आ आफना धारणा ब्यक्त गर्नुभएको थियो ।
स्मार्ट अखबारका सम्पादक नारायण कोइरालाको अध्यक्षतामा सम्पन्न कार्यक्रममा अकला आवाजका आयुष्मा काफलेले स्वागत र खबर कलमका सम्पादक जीवन अर्यालले संचालन गर्नुभएको थियो ।
अनलाइन खबर कलम, स्मार्ट अखबार र अकला आवाज साप्ताहिकको आयोजनामा भीरकोट नगरपालिकाको सभाहलमा सम्पन्न अन्तरक्रियाले ९ बुदें घोषणापत्र पनि जारी गरेको छ । जारी घोषणापत्रमा क्रमश ः १) स्याङ्जा जिल्लाभर विभिन्न संचारमाध्यमहरूमा क्रियाशील पत्रकारहरूबिच मैत्रीपूर्ण सहकार्य एवं सम्बन्ध स्थापित गर्न जोड दिने । २) स्याङ्जाको पत्रकारिताको ऐतिहासिक दस्तावेज तयार पार्न सबै क्रियाशील पत्रकार एकजुट भएर काम अगाडि बढाउने । ३) पेशागत मर्यादालाई उच्च प्राथमिकतामा राख्दै पत्रकारको पेशागत सुरक्षा र आत्मसम्मानप्रति दृढ रहने वातावरण गराउने । ४) स्याङ्जाका आम नागरिकको जनबोलीको प्रतिनिधित्व गर्दै सकारात्मक, नैतिक, सभ्य र मर्यादित समाज निर्माणमा मिडिया मार्फत सकारात्मक र सिर्जनात्मक भूमिका खेल्ने रहेको छ ।
यसैगरी, ५) सिद्धार्थ राजमार्ग स्तरोन्नतिका लागि सरोकारवाला निकायको तत्काल ध्यानाकर्षण गराउने । ६) स्याङ्जाको आन्तरिक एवं बाह्य पर्यटन प्रबद्र्धनको लागि संचार माध्यमबाट पहल गर्दै सरोकारवाला निकायबिच हातेमालो गर्ने ।७) जिल्ला स्थित सरकारी निकायहरूले प्रकाशन गर्नुपर्ने टेण्डर, सूचना , लोककल्याणकारी विज्ञापन एवं विभिन्न सूचनाहरू स्याङ्जामा संचालित संचारगृहहरूमा उच्च प्राथमिकताका साथ प्रकाशित गर्न गराउन सम्बद्ध निकायको ध्यानाकर्षण गराउने । ८) स्याङ्जा जन्मथलो भई स्वदेश तथा विदेशमा रही पत्रकारितामा सक्रिय सबै कलमजिवीहरुलाई भावनात्मक ढंगले एकजुट गराउने । ९) स्याङ्जाको पत्रकारितामा पत्रकार महासंघलाई अगुवा संस्थाको रूपमा लिदै यसलाई गतिशील र शसक्त बनाउन सबै कृयाशील पत्रकारहरु एकजुट हुने उल्लेख गरिएका छन् ।