स्याङ्जा ७ चैत । जातीय विभेद उन्मुलन सम्बन्धी अन्तराष्ट्रिय दिवसको अवसर पारेर दलित महिला जनप्रतिनिधिहरुलाई नेतृत्व विकास सम्बन्धी प्रशिक्षण दिइएको छ ।
सामाजिक विकास कार्यालय स्याङ्जाको आयोजना तथा भीरकोट नगरपालिकाको समन्वयमा जिल्लाका संघिय, प्रादेशिक र स्थानीय तहका दलित महिला जनप्रतिनिधिकालागि नेतृत्व विकास कार्यक्रम गरिएको हो ।
प्रशिक्षण कार्यक्रममा बोल्दै गण्डकी प्रदेशसभा सदस्य एवं पूर्वमन्त्री सीता सुन्दासले जातीय र लैङ्गिक विभेद विकास र समृद्धिको बाधक रहेको बताउनुभयो । दलित महिला जनप्रतिनिधिहरुले आफ्नो क्षमता वृद्धि गरी सामाजिक जागरण ल्याउनुपर्र्नेमा उहाले जोड दिनुभयो ।
समाजमा अझैं पनि जातीय विभेद तथा छुवाछुत कायम रहेको बताउँदै सचेतना कार्यक्रम एवम् कानूनी प्रक्रियाबाट त्यस्ता समस्याको समाधान गर्नु पर्ने उहाँको भनाई छ । समग्र देशको विकास र समृद्धिको लागि आर्थिक, सामाजिक, राजनीतिक क्षेत्रमा दलित महिलाहरु योगदान दिन सक्षम रहेको उहाले भन्नुभयो । राजनैतिक परिवर्तनका उपलब्धिहरु रक्षागर्दै कानून बनाएर पूर्ण कार्यान्वयन गर्न सकेमा मात्र दलित समुदाय र समग्र नेपालीहरुको अधिकार रक्षा हुन सक्ने उहाले बताउनुभयो ।
कार्यक्रममा जिल्ला समन्वय समितिका उपप्रमुख खडकराज सुवेदीले सामाजिक रुपान्तरणको लागि कुनै पनि विभेद अन्त्य गर्दै दलित महिलाहरुको बहुआयमिक क्षेत्रमा सक्षमता अभिवृद्धि गर्नु पर्नेमा जोड दिनुभयो ।
भिरकोट नगरपालिकाका नगरप्रमुख गोविन्दकुमार कर्मचार्यले स्थानीय सरकारले सिमान्तकृत समुदायको सशक्तिकरण र आयआर्जनमा टेवा पुर्याउने गरी नीति, कार्यक्रम बनाएको बताउनुभयो । आगामी दिनमा तीन वटै तहका सरकारको समन्वय र सहकार्यमा दलित समूदायको क्षमता विकास सहित छुवाछुत अन्त्यको लागि कार्यक्रमहरु अगाडी बढाउने उहाले जानकारी गराउनुभयो ।
प्रमुख जिल्ला अधिकारी सुनिता नेपालले दलित महिलाका हक र अधिकार सम्बन्धमा भएका कानूनी र संवैधानिक व्यवस्थाबारे जानकारी दिदैँ व्यक्तिगत घटना दर्ता र नागरिकतामा दलित समुदायले झेलेका समस्या समाधानका उपायबारे सहजिकरण गर्दै समाजमा सचेतना बाट नै छुवाछुत, बालबिबाह लगायतका सामाजिक विकृतिको अन्त्य गर्न सकिने कुरा बताउनु भयो ।
अर्जुनचौपारी गाउँपालिका उपाध्यक्ष सपना गुरुङले जातीय विभेदको अन्त्य गर्दै सामाजिक न्याय र समानता सहितको समुन्त समाज बनाउने सबैले आफ्नो ठाउँबाट भूमिका खेल्नु पर्ने कुरामा जोड दिनु भयो ।
योजना तर्जुमा र बजेट निर्माण प्रकियामा दलित महिला जनप्रतिनिधिको भूमिका सम्बन्धमा प्रशिक्षक लिलबहादूर रन्पाललले सहजिकरण गर्नु भएको थियो । जातीय विभेद र सोको कानूनी व्यवस्थाबारे प्रहरी कार्यालय दहथुमका इन्चार्ज प्रविण कंडेलले प्रशिक्षण गराउनु भएको थियो ।
भिरकोट नगरउपप्रमुख भगवती अर्याल, प्रहरी उपरिक्षक शालिकराम पौडेल लगायतले शुभकामना मन्तब्य ब्यक्त गर्नुभएको थियो ।
सामाजिक विकास कार्यालय स्याङ्जाका कार्यालय प्रमुख जीवन पौडेलको अध्यक्षतामा सम्पन्न कार्यक्रममा दलित महिला सदस्य तथा जिल्ला संयोजक सविता सिंह विश्वकर्माले गर्नु भएको थियो ।
कार्यक्रमको समन्वय भिरकोट नगरपालिका र दलित समुदायको परम्परागत कला तथा सीप विकास संस्थाले गरेको थियो ।
हरेक वर्ष मार्च २१ तारिक दिनमा जातीय विभेद उन्मुलन सम्बन्धी अन्तराष्ट्रिय दिवस मनाइदै आएको छ । जिल्लाभरगरि झण्डै सय जनाको सहभागीता थियो ।