स्याङ्जा २८ साउन । राष्ट्रिय परिचयपत्र बनाउनेहरुको संख्या बढेसंगै स्याङ्जा प्रशासनले सो सेवाप्रवाह समयाबधी २ घण्टा बढाएको छ । प्रशासनले सो सेवा बुधवार (आज) देखि सुरु गरेको छ ।
सामाजिक सुरक्षा भत्ता प्राप्त गर्ने र अन्य बिबिध प्रयोजनका लागि राष्ट्रिय परिचयपत्र बनाउन आउनेको संख्यामा बृद्धि भएपछि स्याङ्जा प्रशासनले सार्वजनिक विदाका दिन बाहेक बिहान ८ बजेदेखि सो सेवा बुधवार (आज) देखि सुरु गरिएको प्रमुख जिल्ला अधिकारी ईश्वरीप्रसाद अर्यालले जानकारी दिनुभयो ।
प्रजिअ अर्यालका अनुसार, ‘पछिल्लो समय सामाजिक सुरक्षा भत्ताप्राप्त गर्ने लाभग्राही राष्ट्रिय परिचयपत्र सम्बन्धी सेवाका लागि एकै पटक विवरण संकलन गर्न यस कार्यालयमा उपस्थित हुँदा सेवाग्राहीको चाप अत्याधिक बढेकाले राष्ट्रिय परिचयपत्र सम्बन्धी सेवा प्रवाहलाई थप ब्यवस्थित र प्रभावकारी बनाउन बुधवार (आज)देखि सो सम्बन्धी सेवा सुचारु गरेका हौ।’
परिचयपत्र बनाउनका लागि फोटो खिच्ने सहितका अन्य काम २ स्थानबाट दिदै आएकोमा अब, आउँदो सातादेखि ३ स्थानबाट सेवा प्रवाह गर्नेगरी तयारी भैरहेको पनि सहायक प्रजिअ दिपक पौडेलले जानकारी गराउनुभयो । दैनिक ३ सय भन्दा बढी सेवाग्राही आउने गरेका पनि उहाले बताउनुभयो ।
सामाजिक सुरक्षा भत्ता, राहदानी, खाता संचालन लगायतका सेवामा राष्ट्रिय परिचयपत्र अनिवार्य गराएपछि केही दिनदेखि स्याङ्जा प्रशासनमा भीड बढेको छ।
सामाजिक सुरक्षा नियमावली, २०७६ र सामाजिक सुरक्षा भत्ता वितरण कार्यविधि, २०७७ अनुसार भत्ताग्राहीले प्रत्येक आर्थिक वर्षको साउन १ गतेदेखि भदौ मसान्तभित्र नवीकरण गराइसक्नुपर्ने कानूनी प्रावधान छ ।