स्याङ्जा ५ भदौ । स्याङ्जा जिल्ला अदालतबाट दोषी करार भएका २५ जना फरार प्रतिवादीलाई प्रहरीले पक्राउ गरेको छ । चेक अनादर, चोरी, अंशवण्डा, लागूऔषध, कर्तब्य ज्यान, अभद्र ब्यवहार, कुटपिट, बैकिंङ कसुर, लेनदेन, सवारी ज्यान र हातहतिरयारमा दोषी ठहर भएका उनीहरुलाई प्रहरीले पक्राउ गरेको हो । यो संख्या साउन महिनाको मात्र होे ।
गत आर्थिक बर्षमा मात्र १ सय १८ जना फरार प्रतिवादी पक्राउ परेका थिए । स्याङ्जाका प्रहरी उपरीक्षक दधिराम न्यौपानेका अनुसार अदालतबाट दोषी करार फरार अभियुक्तलाई पक्राउगरी अदालत बुझाउने अभियान नै सुरु गरेको बिहीवार वालिङमा पत्रकार सम्मेलनको आयोजना गरेर जानकारी दिनु भएको हो ।
कानुन कार्यान्वयनको दिशामा प्रहरीले चालेको यो कदमको सर्वत्र प्रशंसा गरिएको छ । प्रत्येक महिनाको पहिलो साता जिल्ला प्रहरी कार्यालयबाट सम्पादन भएका कामको सार्वजनिक जानकारीका लागि प्रहरीले प्रेस मिटको आयोजना गर्दै आएको छ । साउनमा बिभिन्न आरोपमा २२ जना पक्राउ परेका छन् । चार जनाले आत्महत्या गरेको, ४ लाख ३९ हजार २७९ बराबरको अवैध सामान बरामद, ४८ हजार ७५८ बोट गाँजा फडानी, एक हजार ४२३ जनालाई मादक पदार्थ र लागूपदार्थ सेवन र ट्राफिक नियम उल्लंघनमा पक्राउ गरिएको पत्रकार सम्मेलनमा जानकारी दिइएको छ ।
कर्तब्य ज्यान मुद्धाका फरार कसुरदारलाई २३ बर्षपछि प्रहरीले पक्राउ गरेको छ । चापाकोट — २ धुर्कोटका बाजिन्द्रबहादुर सोतीमगरलाई पक्राउ गरिएको हो । झुटो विवरण दिइ ७ तोला सुन चोरी भएको जाहेरी दिने आँधीखोला १ का चन्द्रकुमारी गुरुङ र धनराज गुरुङलाई पनि पक्राउ गरिएको छ ।
त्यस्तै, बिना प्रवेशाज्ञा प्रगतिनगरमा लुकिछिपी बसीरहेका २ जना जापानीज नागरिकलाई पनि पक्राउगरी आवश्यक कार्यवाहीका लागि पर्यटक प्रहरी कार्यालय पोखरा पठाइएको छ । स्याङ्जा प्रहरीले यसका अतिरिक्त आत्महत्या नियन्त्रण गर्न सचेतना कार्यक्रम, बृक्षरोपण, गाँजा फडानी, अवैध घरेलु मदिरा नियन्त्रण जस्ता कार्यक्रम पनि प्रभावकारी ढंगले गर्दैै आएकोे छ ।