स्याङ्जा ३० असोज । नेपाल प्रहरीको स्थापना दिवसको स्मरण गर्दै स्याङ्जा प्रहरीले बुधवार ६९ औं प्रहरी दिवस मनाएको छ । ‘साईवर सुरक्षा आजको आवश्यकता’ भन्ने मुल नारा सहित स्याङ्जा प्रहरीले विविध कार्यक्रम गरी प्रहरी दिवस मनाएको हो ।
जिल्ला प्रहरी कार्यालय स्याङ्जाको प्राङ्गणमा रहेको अमर प्रहरी स्मारकमा पुष्प गुच्छाद्वारा श्रद्धाञ्जली अर्पण गरि प्रमुख जिल्ला अधिकारी सुनिता नेपालले दिवसको उदघाटन गर्नुभएको थियो । दिवसको शुभकामना व्यक्त गर्दै प्रहरीले समुदायमा पुर्याएको सेवाप्रती आफू सन्तुष्ट रहेको बताउनुभयो । उहाले प्रहरी, राज्य र नागरिकबिच हातेमालो गर्दै शान्ति सुरक्षा कायम राख्नु भएको बताउनुभयो ।
सोही कार्यक्रममा स्याङ्जाका प्रहरी उपरीक्षक शालिकराम शर्माले प्रहरी दिवसका अवसर पारेर प्रहरी महानिरीक्षक वसन्तबहादुर कुँवरद्वारा प्रेषित शुभकामना सन्देश पढेर सुनाउनु भएको थियो ।
दिवसमा नागरिक समाज स्याङ्जाका अध्यक्ष ओमप्रकाश शर्मा, पूर्व प्रहरी नायब उपरीक्षक श्यामकृष्ण श्रेष्ठ लगायतले प्रहरी दिवसको शुभकामना मन्तब्य ब्यक्त गर्नुभएको थियो ।
सोही अवसरमा पुतलीबजार नगरपालिका १ निवासी दीपक लम्साल, जिल्ला रेडक्रस स्याङ्जाका सभापति दिनेश अर्याल, पुतलीबजार नगरपालिका वडा न ४ निवासी महेश बहादुर थापा, पुतलीबजार नगरपालिका वडा न ३ निवासी रमेश शिवाकोटी, पुतलीबजार नगरपालिका वडा न ३ बाड्खोला निवासी साखालिद मिया र सामुदायिक रेडियो स्याङ्जा एफ्.एम्. तथा स्याङ्जा टेलिभिजनका प्रमुख व्यवस्थापक रमेश गोदार लगायतका व्यक्तित्वहरुलाई प्रशंसा पत्रले सम्मान गरिएको थियो ।
त्यस्तै, स्याङ्जा जिल्ला घर भई कार्य शिलशिलामा विभिन्न ठाउँमा वीरगति प्राप्त अमर प्रहरीका एघार परिवारलाई र जेष्ठ पूर्व प्रहरीलाई दोसल्ला ओढाएर सम्मान गरिएको थियो । कार्यक्रममा स्याङ्जा प्रहरी संगठनभित्र रही उत्कृष्ट काम गर्ने प्रहरी कर्मचारीहरु प्रहरी नायब निरीक्षक प्रमोद कंडेल,प्रहरी हवल्दार युवराज तिमिल्सेना, प्रहरी जवान मोहन चेपाङ्, र प्रहरी जवान प्रकाश कोलीलाई पनि सम्मान गरिएको थियो ।
यसैगरी, प्रहरी दिवसका सन्दर्भ पारेर सञ्चालन गरेका खेल व्याडमिन्टन, टेवलटेनिस प्रतियोगिताका विजेताहरुलाई नगद पुरस्कार, शिल्ड, मेडल र प्रमाणपत्रले पुरस्कृत गरिएको थियो ।
सोही कार्यक्रममा कार्य शिलशिलामा क्रममा वीरगति प्राप्त अमर प्रहरीका परिवार, पूर्वप्रहरी, समाजसेवीहरु प्रहरी कर्मचारी सहित रेडियो स्याङ्जाका प्रमुख ब्यवस्थापक रमेश गोदारलाई सम्मान गरिएको थियो ।
यसैगरी, खेल प्रतियोगिताका विजेताहरुलाई पनि नगद पुरस्कार, शिल्ड, मेडल र प्रमाणपत्रले पुरस्कृत गरिएको थियो । प्रउ शर्माको अध्यक्षतामा सम्पन्न कार्यक्रममा प्रहरी नायब उपरीक्षक हरिप्रसाद पौडेलले स्वागत एवं प्रहरी निरीक्षक सुमन चापागाईंले संचालन गर्नुभएको थियो ।