स्याङ्जा २३ मंसिर । अपांगता सशक्तिकरण तथा सामुदायिक विकास केन्द्र पुतलीबजार स्याङ्जाको आयोजना तथा पुतलीबजार नगरपालिका नगरकार्यपालिकाको सहयोगमा अपांगता सम्बन्धी सचेतना अभियान अन्र्तगत सो कार्यक्रम स्याङ्जा सदरमुकाम स्थित स्याङ्जा माध्यमिक बिद्यालयमा गरिएको छ ।
कार्यक्रमको उदघाटन गर्दै पुतलीबजार नगरप्रमुख तुलसीराम रेग्मीले मानिसहरु जन्मदा मात्र होइन जुनसुकै समयमा पनि अपांगता हुनसक्ने बताउदै अपांगताका बिषयमा सबैजना संवेदनशील बन्नुपर्ने बताउनुभयो । अपांगता भन्ने बिषयलाई कुनै पनि भाग्य र कर्मको खेलमा जोड्न नहुने उहाको भनाई छ । अपांगता भनेको शारिरीक अवस्था रहेको जनाउदै अपांगता भएका ब्यक्तिका आवश्यकता पहिचानगरी अवसर दिनुपर्नेमा उहाले जोड दिनुभयो ।
अपांगता ब्यक्तिका लागि राज्यले उपलब्ध गराएका सेवा सुबिधामा पुतलीबजारले पहेंलो कार्ड र पुर्ण अशक्त अपाङ्गता भएका व्यक्तिहरूको लागि स्वास्थ्य विमाका लागि निशुल्क बिमा र स्याहारे भत्ताको सुबिधा उपलब्ध गराएको र आउदा दिनमा पनि निरन्तरता दिईने बताउनुभयो । अपांगता भित्रको फरक क्षमता पहिचान गर्दै अघि बढाउनु पर्ने उहाको भनाई छ ।
वडासदस्य बिष्णुकुमार श्रेष्ठ, पत्रकार महासंघका उपाध्यक्ष भवानी अधिकारी, स्याङ्जा माध्यामिक बिध्यालयका प्रधानाध्यापक लेखनाथ रेग्मी लगायतले मानवमैत्री सहित अपांगतामैत्री संरचना लगायतका बिबिध बिषयमा ध्यान दिनुपर्ने बताउनुभयो ।
स्याङ्जा बहुमुखी क्याम्पस विहानी सत्र इन्चार्ज मनोज खड्काको अध्यक्षतामा सम्पन्न कार्यक्रममा अपांगता सशक्तिकरण तथा सामुदायिक विकास केन्द्रका अध्यक्ष युवराज पराजुलीले स्वागत मन्तब्य र सहजकर्ता नारायणप्रसाद रेग्मीले संचालन गर्नुभएको थियो ।
सोही कार्यक्रममा केन्द्रका अध्यक्ष युवराज पराजुली र अपांग समाज स्याङ्जाका अध्यक्ष रामप्रसाद पोखरेलले अपांगता सम्बन्धी अवधारणा, अपांगताका प्रकार, परिचयपत्र र स्वयंसेवक छनौट सम्बन्धी छुट्टाछुट्टै कार्यपत्र सहित सहजीकरण गर्नुभएको थियो ।
सचेतना कार्यक्रममा सोही बिद्यालयमा कक्षा ११, १२ मा अध्ययरत छात्रछात्रालाई सहभागी गराइएको थियो । सहभागी मध्येबाट विशाल उपाध्याय, प्रकृति सुनार र दिलिसा मल्लले अपांगताका क्षेत्रमा स्वयंसेवी भई सेवा गर्नकालागि आ आफना नाम शिफारिस गर्नुभएको छ ।
