स्याङ्जा, २२ साउन । मालपोत कार्यालय स्याङ्जाले संकलन गर्ने राजश्वमा गिरावट आएको छ । कित्ताकाट र जग्गा वर्गिकरण रोकिदा अघिल्लो वर्षको तुलनामा घरजग्गा कारोबारमा आएको कमिले पछिल्लो आर्थिक वर्ष २०८१÷०८२ मा संकलित राजश्वमा गिरावट आएको हो ।
आर्थिक वर्ष २०८१÷०८२ मा पाँच करोड २७ लाख ९१ हजार ९२६ रुपैयाँ संकलन गरेको कार्यालयले अघिल्लो वर्ष पाँच करोड ८० लाख ९३ हजार ८२१ रुपैयाँ राजश्व संकलन गरेको थियो । अघिल्लो वर्षको तुलनामा पछिल्लो वर्षको राजश्वमा ५३ लाख एक हजार ८९५ रुपैयाँ गिरावट आएको छ ।
कार्यालयले पछिल्लो वर्ष पुँजीगत लाभकरतर्फ एक करोड ६६ लाख २६ हजार ४३२, घरजग्गा रजिष्ट्रेशनमा दुई करोड ७६ लाख २७ हजार ७३७ रुपैयाँ राजश्व संकलन गरेको छ । प्रशासनिक दण्ड जरिवाना र न्यायिक दस्तुरमा १३ लाख २२ हजार ३५५ संकलन गरेको कार्यालयले सेवा शुल्क र रोक्का दस्तुरमा ७२ लाख १५ हजार ४०२ रुपैयाँ राजश्व संकलन गरेको छ ।
पछिल्लो वर्ष लाभकरतर्फ ५७ लाख दुई हजार ६४२, रजिष्ट्रशनमा चार लाख ५१ हजार ५८८ र जरिवाना र न्यायिक दस्तुरमा चार लाख ७ हजार २३९ रुपैयाँ राजश्व संकलनमा गिरावट आउँदा सेवा शुल्क र रोक्का दस्तुर तर्फ भने १४ लाख २३ हजार ७४७ रुपैयाँ बृद्धि भएको मालपोत प्रमुख बालप्रसाद श्रेष्ठले जानकारी दिनुभयो ।
राजश्व संकलनमा गिरावट आएसँगै अघिल्लो वर्ष घरजग्गाको रजिष्ट्रेशनतर्फ एक हजार ७ धितो बन्धक र ९४५ लिखत पास भएकोमा पछिल्लो वर्ष कारोबारमा समेत कमि आएर धितो बन्धक ९९९ र लिखत पास ९०७ भएको छ ।
घरजग्गा रजिष्ट्रेशनमा उठेको दुई करोड ७६ लाख २७ हजार ७३७ रुपैयाँ राजश्व मध्ये ६० प्रतिशत अर्थात एक करोड ६४ लाख १० हजार ८७५ रुपैयाँ सिफारिस गर्ने पालिकामा फिर्ता भएको छ । रजिष्ट्रेशन दस्तुरतर्फ बाँकी रहेको ४० प्रतिशत रकम प्रदेश सरकारमा गएको मालपोत कार्यालयले जनाएको छ ।
कार्यालयका अनुसार विगदेखि कित्ताकाट नहुँदा, जग्गा वर्गिकरण हुन नसक्दा राजश्व संकलनमा गिरावट आएको हो । जिल्लाका ११ पालिका मध्ये अधिकांशले जग्गाको वर्गिकरण गरेर पूर्नमुल्याङ्क गरेका छैनन् भने धेरै पालिकाले सडक निर्माण गरेरपनि २०६० देखि हाल साविक (अपडेट) नगर्दा राज्यलाई करोडौ मुल्य बराबरको राजश्व गुमेको छ ।