स्याङ्जा २४ भदौ । आन्दोलनरत युवाहरुको समूहले स्याङ्जा स्थित नेपाली कांग्रेस, नेकपा एमालेको जिल्ला पार्टी कार्यालय र पुतलीबजार नगरपालिकको कार्यालयमा तोडफोडगरि क्षति पु¥याएका छन् भने पुतलीबजार नगरपालिकको प्रवेशद्धारमा आगजनी गरेका छन ।
दिउसोभर शान्तिपूर्ण प्रदर्शन गरेका युवाहरुले साँझपख कांग्रेसका संस्थापक वीपी कोइरालाको शालिक र एमाले नेता मदन भण्डारी र जीवराज आश्रितको शालिकमा समेत प्रहार गरेका थिए ।
प्रमुख जिल्ला अधिकारी इश्वरीप्रसाद अर्यालका अनुसार दिनभरी शान्तिपूर्ण प्रर्दशनमा उत्रिएका युवाहरुका उत्तेजित समूहले साँझपख कांग्रेस र एमालेका जिल्ला स्थित मुख्यालयमा ढुंगा प्रहार गरेका हुन्। ढुंगा प्रहारबाट शिशा फुट्नुका साथै तोडफोड भएका छन ।
यसैगरी, प्रदर्शनकारीले पुतलीबजार नगरपालिकाको कार्यालयमा पनि तोडफोड गरेका छन्। नगरप्रमुख तुलसीराम रेग्मीका अनुसार आफू र उपप्रमुख कार्यालयमै रहेको अवस्थामा उत्तेजित समूहले अकस्मात नगरपालिका परिसरभित्र प्रवेशगरी तोडफोडगरी क्षति पुरयाएका हुन।
जिल्लाका बिभिन्न भागमा शान्तिपूर्ण जुलुस प्रदर्शन भएका छन्। स्याङ्जामा ठूला शहर वालिङ, चापाकोट र गल्याङमा पनि जेन—जी समूहसंगै अन्य युवाहरु सम्मिलित प्रदर्शन गरेका हुन।
स्वतस्फूर्तरुपमा आन्दोलित सो समूहले सोमबार साँझ मृतात्माको शान्तिको कामना सहित सरकार बिरुद्ध खबरदारी गर्दै दिपावली गरेको थियो ।